Ka Sorkar ka angnud ban pynneh ïa ki riti dustur ba la buh da u menbarim: Conrad Sangma

Shillong, Jymmang 15: U Myntri ka sorkar jylla u Conrad K. Sangma ha ka sngi Palei u la buh ïa u mawnongrim na ka bynta ban tei ïa ka Indigenous Cultural Centre jong ka Seng Khasi Kmie ha Mawkhar, Shillong, East Khasi Hills ha ka jingïadonlang u Symbud Myntri Rangbah u Bah Prestone Tynsong, nangta u Myntri ka tnat Minister Art and Culture u Bah Paul Lyngdoh, longheh longsan, ki tymmen ki san bad ki dkhot jong ka Seng Khasi da kaba pynpaw ruh ïa ka jingangnud jong ka sorkar ban pynneh pynsah ïa ki riti dustur ba la buh da ki longshwa manshwa.
ïa kane ka centre la sdang ban tei ha ka jinglut kaba T. 15 klur, bad kaba la buh ïa ka jingthmu kaba long kum ka lynti sha ka Khasi heritage. Kane ka jaka kan ai ka jingmyntoi ym tang ban pyndep ïa ki kam riti dustur hynrei kiwei kiwei pat ki jingrakhe ne lehkmen.
“Kane kam dei satia tang ka building, hynrei ka dei ruh ban rakhe ïa kiba bun ki kam riti dustur bad kumjuh ruh ban pynneh pynsah ïa ki na ka bynta ka jingmyntoi jong ka pateng ban wan,” ïathuh u Myntri Rangbah.
“Lah da ki spah snem mynshwa la pynlong ïa kine ki jinglehniam ha ki jaka bym biang ki lad jingtei bad mynta lyngba ki lad jingtei bapher bapher ngin sa lah ban pyndep lut ïa kine ki jingrakhe jong ki paidbah,” u la bynrap.
Haba ong ba ki kynhun bapher bapher jong kane ka thaiñ shatei lammihngi ki la don la ki jong ki rukom im bapher bapher u Myntri Rangbah u la ong, “Ngi khlem pat lah satia ban buh jingthoh ïa ki khana pateng jong ngi, nangta ki jingngeit jong ngi bad ki riti dustur. Kumta dei lyngba ka Chief Minister Research Fellowship (CMRF), ka sorkar ka kwah ban kyntiew ïa ki kam wad bniah khnang ba ïa ki riti dustur jong ngi yn lah ban pynneh pynsah.”
“Naduh u snem 2018, ka sorkar ka la pyrshang ban kyrshan, ban pynneh pynsah bad ban rakhe ruh ïa kiba bun ki jinglehniam kiba wanrah ïa ki jingriewspah, kiba kynthup ïa ka tem ka put bad kiwei kiwei,” u la bynrap.