Shillong, Naiwieng 05 : Ka Iapdkoh Khapmaw Sports Club kaba hap ha Mawkynrew C&RD Block, East Khasi Hills District ha ka sngi Saitjaiñ jong ka taïew ba dang shu dep ka la pynlong ïa ka prokram kaba shi sngi da lai tylli ki jingpynïakob ha madan jong ka shnong Khapmaw.
Ki lai tylli ki jingpynïakob ba ka Iapdkoh Khapmaw Sports Club ka la pynlong ka kynthup ka jingïakob mareh marathon, ki jingïalehkai kynjatbol bad ka jingpynïakob shad.
Ha ka Marathon ki don haduh 110 ngut ki samla kiba la ïashim bynta ïa kaba ïa ka nam lahduh la ïohrah da u Banshan Umsong, ha ka jingïalehkai kynjatbol ki don 4 tylli ki team ba kynthup ka Driver khapmaw, ka Nangkiew FC, ka Young Boy Sports Club bad ka Mawjam Sports Club.
Ki team kiba poi final ki long ka Nangkiew FC bad ka Young Boy SC ha kaba ka Nangkiew FC ka la ïoh rah ïa ka nam lahduh da 5-4 kol lyngba ka tie breaker. Ha kawei pat ka jingïalehkai kynjat bol kaba shongshit bha, ka kynhun ki longkmie ki la pynliem ïa ka kynhun ki khynnah bad samla da 4-3 kol lyngba ka tie breaker.
Khatduh ha katei ka sngi la pynlong ïa ka jingpynïakob shad bad ïa ka nam lahduh la ïoh rah da u samla Merlin Nongkynrih. Ha kaba kut jong ki prokram la sam ïa ki khusnam da u Kongsan u Bah Prosing Umsong Sordar shnong barim lem bad kiwei kiwei ki riew Rangbah jong ka thaiñ.
