Shillong, Nailar 23 : U MLA ka Liang Pyrshah ha Iing Dorbar Thawaiñ ka jylla na Mawsynram, Bah HM Shangpliang ha ka sngi Ba-ar u la ong ba mynta la ar snem ki shnong ba don ha khappud India-Bangladesh ki khlem ïoh satia wat tang shi naïa ruh ha kine ki arsnem mynta watla ha kiwei ki snem ki ïoh da ki klur tyngka.
Haba kren bad ki lad pathai khubor, u Bah Shangpliang u ong lada kren tang ïa ka Mawsynram constituency ki ju ïoh kumba 2klur tyngka shisnem na katei ka skim ban kyntiew ïa ki shnong khappud ba ju tip kum ka Border Area Development Programme kaba ju ai da ka sorkar pdeng lyngba ka tnad Kampohiing ka Ri.
“Kaba sngewsih ka long ba mynta la arsnem shi naïa ruh ngim pat ïoh,” u la ong.
Da kaba ïathuh ba u la pyrshang ban wad ïa ka daw tynrai da kaba kren naduh ki ophisar ba rangbah ba dei peit ïa katei ka tnad hynrei um shym la ïoh satia ïa ka jubab kaba pynhun. Shuh shuh u la ïathuh ruh ba ki projek ba u tyrwa na bynta ka thaiñ ka la kot sha kumba 2klur tyngka ha u snem 2021-22 bad kumba 2 klur biang jong u snem 2022 – 23 hynrei ym pat don dak ei ei.
“Mynta ngi don sa kumba hynriew bnai shw ka elekshon kumta ki paidbah jongngi kiba don ha khappud ki la khmih lynti ban ïoh noh ïa ki song kam pynroi lyngba ka tnad Border Area. Nga lyngoh bad sngewbynñiaw haduh katta katta halor kane ka jingleh jong ka sorkar jylla halor kane ka bynta,” u la bynrap shuh shuh.
Utei u MLA u kyntu jur ruh ïa u Myntri Rangbah ban tuklar mardor halor katei ka bynta khnang ba ki paidbah ba sah ha khappud kin ïoh ïa ki song kam pynroi kiba ka sorkar pdeng ka ju ai lyngba ka tnad Kampohiing jong ka Ri. U ong ruh ba kadei ka kamram jong ka sorkar bad ka tnad ba dei peit, ban ïit bniah kiei ki jingbakla ne ki jingduna kiba pynlong ïa ka jylla ban ym ïoh shuh ïa kitei ki song kam pynroi na ka sorkar pdeng ha kine ki ar snem.
