Shi jingim yn kynmaw ba u Bah Shakliar bad Bah Methodios ki dei ki Khasi bym kwah CM Khasi: HYC
Lada ai CM ia u Bah Prestone ne Sniawbhalang ngi pdiang sngewbha namar ki dei ki jong ngi
Shillong, Lber 06: U President ka HYC u Bah Robertjune Kharjahrin u la ong ba ki kam kiba ki arngut ki MLA ka HSPDP ki la leh ha kine ki khyndiat sngi kiba ka don ka jingthmu ban thaw sorkar ban ïalam da ki seng riewlum bad bat Myntri Rangbah da u Khasi ka pyni shai kdar sha ka jaidbynriew ba ki dei ma ki bym kwah ban ïoh Myntri Rangbah da ki doh ki snam jong ngi.
Haba kren sha ki lad pathai khubor u Bah Robertjune u la ong, “Ka jingleh u Bah Shakliar Warjri bad u Bah Methodios Dkhar ha kato ka sngi ba mut thaw sorkar ban ïalam da ka seng riewlum ban bat Myntri Rangbah da u Khasi ka pyni ba dei ma ki bym kwah bad kane ka jingleh jong ki yn sa kynmaw shijingim bad kan sah ruh ha ki khana pateng jong ka jaidbynriew.”
U la ong ba ka jingthang ïa tyngshop jong ki arngut ki MLA ka HSPDP da ka HYC ha kine ki khyndiat sngi ba la dep ka dei namar ka jingleh kine ki arngut ba ka jingangnud ban ïoh Myntri Rangbah Khasi ka pulom noh.
“Jin lada ki arngut ki MLA ka HSPDP kim leh ha kato ka dur ngi nud ban ong ba ka jingkwah ïoh Myntri Rangbah da u Khasi kan urlong hynrei namr ka jingleh jong ki ka pynlong ba wat u MLA shismet un phet lang noh bad ki sha ka sorkar ban ïalam da ka NPP, namarkata ka jinthang tyngshop jong ngi ruh ka dei beit na kane hi ka daw,” u la ong.
U la ong ba ka jingkwah ka HYC ban ïoh Myntri Rangbah da u Khasi ka dei namar kiba bun bah ki jingangnud kiba ka jaidbynriew ka don yn lah ban pynurlong namar kum u Khasi kin don beit ïa kajuh ka jingsngew khia.
“Ka jingpan ban ïoh rung ka Ktien Khasi ha ka Khyrnit ba Phra kan ym urlong lada ngim ïoh Myntri Rangbah da u Khasi namar lada dei ba ka Home Ministry ka ong ba kam lah ban pynrung artylli ki ktien na kawei ka jylla ha ka juh ka por phin tharai u Myntri Rangbah Garo un ong pynrung noh shuwa da ka ktien jong ngi, namar lada phi peit ka ktien jong ngi ka la tam da bun bun spah shah ha ka rynïeng rynïot ban ïa ka ktien Garo,” u la ong.
“Lada dei ba ka NPP kan thung Myntri Rangbah da u Khasi lada dei da u Bah Prestone Tynsong ne Sniawbhalang Dhar ngin pdiang sngewbha ïa kane ka sienjam hynrei naduh kaba sdang ngi la tip luoa ba kane kan ym urlong namar ka NPP ka la dep rai ba u Conrad un dei u Myntri Rangbah ka jylla,” u la bynrap.