Mawkyrwat, Jymmang 06 : Ka ophis jong u District Sports Officer (DSO), South West Khasi Hills District, Mawkyrwat shen kan sa sdang ïa ka South West Khasi Hills District Level Inter-School Subroto Mukherjee Cup Football Tournament 2025 na ka bynta ki khynnah kiba hapoh 15 snem (Shynrang) bad ki khynnah kiba hapoh 17 snem (Shynrang bad Kynthei) naduh ka 27 tarik u bnai Jymmang, 2025.
Namarkata, na ka liang ka ophis ka bthah ïa ki skul kiba don hapoh jong ka South West Khasi Hills District kiba kwah ban ïa shimbynta ha kane ka lympung ïalehkai kin sngewbha ban wan shim ïa ki phom (Registration Form) na ka ophis treikam jong u DSO, South West Khasi Hills District ha ki sngi long trei.
Ka tarik ba khatduh ban pynpoi ia ki phom kan long hapoh ka 15 tarik u Jymmang, 2025. Baroh ki khynnah ki hap ban wan na ka bynta ka Screening kaban long ha ka 21 tarik u Jymmang 2025.
Ka sngi kha na ka bynta kito ki nongïashimbynta kan long 15 snem shapoh (Shynrang) naduh 1 tarik u Kyllalyngkot 2011 shaneng bad kiba 17 snem shapoh (Kynthei & Shynrang) naduh 1 tarik u Kyllalyngkot 2009 shaneng.
Ïa ki jingtip ba kham bniah ki lah ban wan kylli na ophis lane phone ha kine ki No. 8729852727 / 9366071684. Kane ka long katkum ka kyrwoh khubor ba la phah da u bah D. Syngkon, District Sports Officer, South West Khasi Hills, Mawkyrwat.
