Shen yn sa aiti ka Committee ïa ka kaiphod ban pynwandur thymmai ïa ka MPSC, ong u Chief Secretary

Shillong, K’ Lyngkot 07: U Chief Secretary ka jylla u Bah DP Wahlang ha ka sngi baar u la ïathuh ba ka committee kaba la thung ban wad ïa ki lad ki lynti ban mynjur ïa ki jingdonkam ban pynwandur thymmai ïa ka Meghalaya Public Service Commission (MPSC) shen kan sa aiti ïa ka kaiphod ha shwa ban kut jong une u bnai.
Haba kren sha ki lad pathai khubor, u Bah Wahlang u la ong, “Ïa kane ka committee la dep ban thaw bad ki la dep ruh ban shong ïa ka jingïalang bad ïa ka kaiphod la khmih lynti ba kin sa aiti ha shwa ban kut jong une u bnai.”
“Ïa nga la pyntip ba ki la sdang bad kumjuh ruh ki la kynthup lang ïa ki riewshemphang kiba kongsan (experts) na shabar. Kin sa pynlong ka jingïalang bad kin sa khot sngewbha ruh ïa ki katto katne ki dkhot na ki paidbah bad nga thikna ba ka committee kan sa ïathir ïatai bad kan sa aiti ïa ka kaiphod ha ka por kaba biang,” u la bynrap.
Haba ïadei pat bad ka jinglong jingman jong ka expert committee halor ka bhah thungkam thungjam ka jylla ne ka state reservation policy, u CS u la ong, “Ki la dep wan jngoh ïa ka jylla bad ki la shong ruh ki jingïalang ha Shillong, Jowai bad kumjuh ruh sha Garo Hills bad ki la pynlong ruh ka jingïalang kumba shi taïew bad kumjuh ruh ha u taïew bakhatduh ha Delhi ha kaba baroh ki dkhot ki la donlang ban ïasyllok ïa ki jingshem ha ki por ba ki la leit sha kine ki jaka kylleng ka Meghalaya. Nga tharai ki dang don hapdeng ka lynti ba kin thoh ïa ka kaiphod mynta.”
Ha kawei pat ka liang u la bynrap, “Katno kin shim por ban pyndep ïa ka kaiphod, ïa mynta ngam pat ïoh jingtip halor kane ka bynta. Haoid ki jingïalang ki la dep.
Ki la dep ban kynduh ïa ki riewshemphang, ki nongïalam seng saiñ pyrthei, ki nongïalam ki samla pule, ki Sengbhalang, ki dkhot jong ki paidbah kylleng ka jylla, ba kynthup ruh ha Jowai, Shillong bad ha Tura.”