Shen yn lum u Conrad ïa ka National Executive ban plie lad ïa ki kyrtong MP ban thep kyrteng

Shillong, Naiwieng 18 : U Nongïalam ba rangbah jong ka National People’s Party ha ka Ri, u Conrad K Sangma u la ong ba shen un sa lum noh ïa ka jingïalang jong ka National Executive na ka bynta ban sdang noh ïa ka jingkhot aplikeshon ïa ki kyrtong kiba thrang ban aireng ha kane ka elekshon MP.
“Ngan sa rah ïa kane ha ka jingïalang jong ka National Executive ban bthah ïa baroh ki jylla ba kin sdang noh ïa ka jingkhot aplikeshon na kito ki ki kyrtong kiba kwah ban aireng ha kane ka elekshon sha Lok Sabha bad hadien kata pat ka party kan sa rai,” u la ong haba kren bad ki lad pathai khubor.
Halor ka jingkylli la ka don neem ka jingtyrwa na u MLA barim ka Umroi Bah George B Lyngdoh ban pan ïakhun na Shillong seat na ka tiket NPP, na ka liang u Conrad ba dei ruh u Myntri Rangbah ka jylla u la ong, “Ngam pat kwah satia ban ong ei ei mynta mano kiba wan tyrwa ne mano kiba wan pan tiket bad mano kiba don ha ka thup bad kino ki bym don namar kine baroh ki dei kiba ju long bad ju jia bad kin ïai jia hi.”
Da kaba pynpaw ba ki don bun bha kiba kwah ban aireng ha kane ka elekshon naka party NPP, u Conrad u la ong ruh ba kane ka pyni ba ka don ka jingsngewtynnad na ka liang ki paidbah ha ka NPP. “Kane ka pyni ba ka don ka jingkwah na ki bad kane hi kadei ka dak ba ka don jingkyrmen.”
Shuh shuh u ong ruh ba ka party kan syllok lang ïa baroh bad shim ïa ka rai wat haba ïadei bad ka Shillong parliamentary seat ruh kumjuh.
“Nga bat beit ïa kaei kaba nga ong ba haba ngi rai ngin syllok lang baroh bad ngi kwah ruh ban shim ïa kane ka rai da ka rai lang da baroh. Lehse bunsien ka lah ban long bad ka lah ruh ban ym long namar ki don bun kiei kiei hynrei ngin sa bishar bniah ïa kine baroh naba ha kaba khatduh hi donkam tang uwei u kyrtong bad ïa kata ngin sa shim ha ka por kaba biang eh,” u la bynrap biang.
Haba jubab halor ka jingkylli la kadei neem kaba shisha ba ki don haduh san ne hynriew ngut kiba pan tiket na ka party, u Conrad u la ong ba kam long satia kaba dei ïa ka party ban ai tiket ïano ïano kiba dang shu wan pynïasoh sha ka party.
Na ka liang u Conrad u la ong ruh ba haba halor ka Tura seat, ka MP ba mynta ka pynpaw ba ka dang kwah ban aireng biang ha kane ka elekshon kaban wan kumta na ka liang ka party kan sa rai halor ki aplikeshon kiba poi bad hadien ba la poi lut kin sa shim ïa ka rai.