Hakhmat Secretariat yn shong kyllaiñ mynngor khlem pud sngi ki ASHA ba mynthi ka Sorkar MDA

Shillong, Naiwieng, 18: Ka Executive Committee jong ka Meghalaya ASHA Workers Union (MAWU) kaba la long ha ka sngi Saitjaiñ ka la shim ïa ka rai ban pynjur shuh shuh ïa ki jingïakhih da kaba pynlong ïa ka jingïashong kyllain myngnor kaba khlem pud sngi hakhmat ka ophis Secretariat ka ban sdang naduh ka 27 tarik mynta u bnai kum shi bynta ban pyrshah ïa ka jingleh kuman jong ka Sorkar ïa ka jingdawa jong ki ASHA ban kyntiew ïa ka jingsiew bainong na ka T.2 hajar sha ka T. 5 hajar.
Ka President jong ka Union ka Kong Mirajune Myrsing ha ka jingïakren bad ki lad pathai khubor hadien ba la wai ka jingïalang ka la ong, “ka jingïalang ka la shim beit da kawei ka rai, katba ka Sorkar kam pat sngew pat sngap ïa ki jingdawa jong ka MAWU, ki ASHA ki la rai ban ïaid beit shakhmat ban pynlong ïa ka jingïakhih jong ngi. Ïa ka wat kaba nyngkong ngi ladep pynlong da ka Peace Rally bad ka wat kaba ar ka long ba ngin ïaid shakhmat naduh ka 27 tarik, Naiwieng, 2033, ki ASHA ki la rai ban shong kyllaiñ mynngor hakhmat ka Ophis Secretariat kaba khlem pud sngi.”
Haba kylli, ka Kong Myrsing ka la ong, “hadien ka jingpyndep ïa ki Peace Rally ha ki distrik bapher bapher jong ka Jylla, ngi ïohi ba ka Sorkar Jylla ka la sngap kuman beit ïa ki jingdawa jong ki ASHA. Kat haduh mynta ka Myntri jong ka tnat ka Koit ka Khiah ka sngap beit bad kam patiaw eiei ïa kaei ka jingdawa bad ka jingkwah jong ki ASHA.”
“Ka jingïakhot ïakren jong ka Kong Ampareen ïa ki ASHA, ngi sngew kumba ka shu khot ha madan madiah. Ban shu ong ba ki ASHA lada ki kwah ban ïakren bad nga, nga kloi ban ïakren bad ki, kata ka pyni ba tang na ka liang ki ASHA ki kwah ban kren, katba na ka liang ka Kong Ampareen kam kwah ban don ïa kano kano ka jingïakren bad ki ASHA. Lada dei ba ma ka, ka kwah shisha ban ïakren ïapynbeit ha ka jingshisha ka ladei ban ai da ka shithi (Official Letter) ba katta tarik wan ïakynduh ïa nga. Hynrei ka jingkhot jong ka, ka long tang lyngba ki lad pathai khubor. Na ka liang jong ka Union ruh ka ngi phah ïa ka khubor sha ka Myntri, lada ma ka, ka kwah ban ïakren bad ki ASHA, ngi long kiba kloi ban leit sha ka jingïakren,” la bynrap ka Kong Myrsing.
Ka la ïathuh ruh, shisien ba ki ASHA ki la sdang ïa ka jingïakhih da kaba shong kyllaiñ myngngor ka jingïakhih kan ïaid beit shakhmat bad sngi bad miet.
“Ha ka 27 tarik mynta u bnai, ka jingïashong kyllaiñ myngngor kin dei beit tang ki dkhot jong ka Executive Committee. Lada ka jingïakhih kam poi shaei shaei, ha ka sngi kaba bud, kata, ha ka 28 tarik mynta u bnai, baroh ki ASHA na kylleng ki distrik jong ka Jylla kin sa ïashim bynta lang ha kane ka jingïakhih,” la pyntip ka President jong ka MAWU.
Ka Kong Myrsing ka la ai khublei ruh ïa ki nongtrei ASHA kiba la pynlong ïa ki Peace Rally ha ki distrik bapher bapher bad kumjuh ruh ïa ki sengbhalang bad ïa ki Rangbah Shnong jong ki shnong bapher bapher kiba la synran lang bad kiba la ai jingkyrshan ha ka jingïakhih jong ki ASHA ha ka wat kaba nyngkong.