Shen yn ïasoi soskular ka Sorkar bad ka Kerela Psychiatric Society ban weng jingduna ki Psychiatrist

Shillong, Jymmang 09: Ka Sorkar jylla shen kan sa ïasoi soskular Memorandum of Understanding (MoU) bad ka Kerela Psychiatric Society ban weng ïa ka jingduna ki Psychiatrist ba la dep hikai pyntbit hapoh ka Jylla.
Ïa kane la pynbna da u Myntri ka Tnad Social Welfare Bah Paul Lyngdoh uba la ong ba ka Jylla ka la mad ïa ka jingeh ha ka jingduna ki Psychiatrist kiba la pyntbit ban sumar ïa ki nongdih drok ha ki detox centre.
“Kumta, nga kmen ban pyntip ba ngin sa ïasoi noh shen ïa ka MoU bad ka Kerela Psychiatric Society ha kaba haduh 72 ngut ki Psychiatrist lah dep ban ithuh bad hadien ba ngi peit ïa ka jingdon pisa, ngi dei ban lah ban pyndonkam ïa ka jingshakri jong ki katto katne na kine ki Psychiatrist ha ka wat kaba nyngkong,” u la ïathuh.
Haba ïathuh ïa kane, u Director ka DREAM u Bah Francis Kharshiing ula ong, “Ngi don tang 11 ngut ki Psychiatrist ha ka Jylla bad bun na ki, ki dei kiba don ha Shillong. Ngi don hapdeng ka jingeh. Kane ka dei kawei ka kam kaba ngi lah ban leh eiei”.
U ïathuh ba ka Sorkar ka phai khmat ban don kawei ka detox centre ha man ki district ka Jylla. Ïa mynta, ki don tang artylli ki detox centre-kawei ka Shillong bad kawei ka Tura.
“Watla ki don bun ki detox centre ba shimet, ngi kham sngewkhia halor ki samla ki bym shah kheiñ briew ha ka imlang sahlang bad kito kiba wan na ki longïing BPL. Hynrei, namar ka jingduna ki Psychiatrist, ngim shym la lah ban plie ïa ki detox centre,” u la ïathuh.
Na ka liang u Bah Kharshiing ula pyntip ba ula shong jingïakren bad ka Kerela Psyciatric Society ha ka jingleit jong u sha Kerela bad ki la pynpaw ïa ka jinglong kaba kloi ban ai ïa ka jingshakri jong ki hapoh ka Jylla Meghalaya.