Shillong, Jymmang 09: Ka North-Eastern Hill University (NEHU) ha ka sngi Thohdieng ka la pynkup burom ïa u professor uba la ïoh ka khusnam Padma Shri u Prof. David R. Syiemlieh, uba dei u khun jong kane ka jylla bad historian ba la pawnam jong ka Northeast India.
Ha kane ka programme la sakhi da ka jingïashim bynta jong ki nonghikai, ki samla pule barim bad kiwei kiba la ïalumlang ban ai ka burom ïa une u nonghikai ba pawnam.
Na ka liang ka Prof. S. M. Sungoh, Vice-Chancellor In-Charge, ka NEHU, ka la ïathuh ïa kiba bun ki jingnohsynniang jong u Prof. Syiemlieh ha kiba bun ki kam jong ka University ha kaba u la shakri ha kiba bun ki kyrdan kiba paw ba kynthup kum u Dean of Students’ Welfare, Controller of Examinations, Registrar, bad Pro Vice-Chancellor. Ka la pynpaw ruh ki jingjop jong u ki la phah lang ym tang ha ki kam jong u shimet hynrei ha ka bor ka jingsngewrit, ka jingnang jingtip bad ka kam shakri. “Ka jingim jong phi ba phi la trei ym tang ba ki la pynphyrnai ha ki sawdong ki kamra pule hynrei ka la wanrah ruh ka jingsarong kaba khraw ïa ki nongshong shnong ka jylla Meghalaya bad ka Northeast.”
Katba ha ki jingkren jong u, u Padma Shri Prof. David R. Syiemlieh u la pynpaw ka jingïaroh jong u naduh mynsiem ïa kane ka jaka pule kaba la pynwandur ïa ka jingïaid lynti jong u ha ka Dr. Graham Home, Kalimpong; St. Edmund’s College, Shillong; bad NEHU.
Haba pynkynmaw ïa ki sngi ba u la long kum u Chairman ka Union Public Service Commission (UPSC), u la kren shaphang ki jingkordor kaba u la bat, ba kynthup ruh ïa ki nongtrei kiba la ai ki jingkyrshan. Ka kam kaba u la leh ha ka por ba u dang trei hapoh ka UPSC ka long ba ula khot ïa ki peon, ki stenographer, bad ki secretary ban ïadih sha lang ha ki kamra interview ha shwa ka jinglehkmen Christmas.
U Prof. Syiemlieh u la ai burom sha ka NEHU halor ka jingïoh jingithuh jong u da ka khusnam Padma Shri, ha kaba ka kam jong u kum u nonghikai, u nongïalam ba u administrator ka la kiew shaphrang. U la pynpaw ruh ba ka kam research scholar jong u ka la ïarap ïa kiba bun ki nongpule ban kiew kynthup ïa Prof. Shobhan Lamare-bad u la pynpaw ka jingsarong halor ki jingkiew shaphrang jong ki. Da ka jingsngewrit u la kynmaw ruh ïa ki nonghikai bad ki paralok jong u kum Prof. J. B. Bhattacharjee, Prof. Imdad Hussein, Prof. Milton Sangma, bad Prof. J. B. Singh kiba kyrshan ïa u. U la pynkut ruh da kaba pynpaw ba ki samoi treikam jong hapoh ka UPSC, ka jingsngewtynnad na ka bynta ka history kam shym la kut, kumba la sakhi da ka jinglah jong u ban pynmih ïa 3 tylli ki kot katba u dang trei ha kane ka ophis.
Ïa ka programme la pynkut da ka jingkren ai khublei na Prof. S. Umdor, ba la pynpaw ruh ïa ka jingsarong jong ka NEHU ïa u Prof. Syiemlieh bad ki jingjop jong u bad la kitbok ruh ïa u ba un dang kiew ha ki kam jong u kiba manla ka sngi khamtam ha ki kam wadbniah.
