Shillong, Nailar 30 : Uwei u Ophisar ka Enforcement Directorate uba kyrteng u Shekhar Kumar uba la shah kynnoh kham hashuwa ha ka ha ka kam bam pisa ha Kerela, ula ngat mynta sa ha ka jingshah kynnoh thymmai ha Meghalaya, ha kaba uwei u briew uba shah khot hajir ban kylli jingkylli, ula kynnoh pynban ba u shah shoh bad shah ktah kti ha utei u ophisar ha ka por ba shim jingthoh ïa ki jingbatai jong u.
ïa ka jingujor la aiti ha u Nongmensong Police Station ha Shillong da u Advocate Niksrang Ch. Marak na ka bynta u Sansilstone Sangma. Kat kum ka jingujor, u Sangma ula leit mih hakhmat ka ED ha ka 27 tarik Nailar hadien ba ïoh pdiang ïa ka shithi khot hajir ban shim jingthoh ïa ki jingbatai ïa ka case ba pynngat pyrshah ïa u.
U Sangma ula kynnoh ba une u Ophisar ba kyrteng u Shekar Kumar, ula ktah kti ïa u ha ka por kylli jingkylli. Une u nong ujor ula pyntip ba ula ai ka jingïatreilang bad ka jingtohkit bad um shym la ïaleh pyrshah ne pynthut ïa ka jingtohkit ha ka por ba jia kane ka jingshah ktah kti.
Hadien kane ka jingshah ktah kti, u Sangma ula pyntip ba ula shitom, ka tyrpeng bad ka kti jong u ki la at bad jngem snam. La pynkit noh mar mar ïa u sha Civil Hospital Shillong ban phah khmih ha ki doktor. ïa ka medical record la suh lang bad ka jingujor bala aiti sha ki Pulit.
Ka jingdawa ba hakhmat eh ha ka jingujor ka long ban sumar ia ki video CCTV na ka Ophis ka ED. U nongmudui ula kyntu ïa ki Pulit ba kin leit shimti noh mardor ïa ki recording, ki server data bad ki video na ka kamra tohkit, ka lynti ïaid bad ka jaka ryng hashuwa ban pynduh pyndam, ne pynjulor ïa kine ki sakhi.
U nongïasaid aiñ ula dawa ban leh ïa ka jingpynithuh bad bishar ïa baroh ki Ophisar bad ki briew kiba ïadon lang ha ka kamra ha ka por ba pynlong ïa ka jingtohkit. Nalor kane, ula kyrpad ïa ka jingtohkit kaba khuid, ban sumar ïa ki sakhi electronics, lum ïa ki medical record bad tohkit ïa une u Ophisar ED bad kiwei ki sakhi.
Kane ka jingkynnoh kala mih hapdeng ka jingpaw ka kyrteng u Kumar ha kawei pat ka kam bam pisa ha Kerela.
Ha u 2025, ka Kerela Vigilance and Anti-Corruption Bureau kala jer kyrteng ïa u Kumar, uba shakri ha katei ka por bad ka ED Kochi Unit, ha ka case ba kynnoh dawa pisa haduh 2 klur tyngka ban pynsangeh ïa ka jingtohkit ED pyrshah ïa uwei u nong khaïi.
Ha ka jingtohkit, uwei na kiba shah kynnoh la ïoh kem pynleiñ ba u dang pdiang ïa ka song pisa ba 2 lak tyngka, kaba lam shuh shuh sha ka jingkem ïa ki briew bad ka jingbishar bniah ïa kane ka kam bam pisa.
