Ka jinglong nongïalam ka shong ha ka jinglah ban shim jingkitkhlieh: Roy Kupar Synrem HYC

Khliehriat nailar 30 : U President jong ka Hynñiewtrep Youth Council –Central Executive Ccouncil, u bah Roy Kupar Synrem, haba kren ha ka jingïalang pynbam smai ïa ki dkhot ba la jied thymmai ba la pynlong hynnin ka sngi saitjaiñ ha Ladrymbai Datsimpeiñ, Community Hall, East Jaiñtia Hills District u la ong ba ka jinglong nongialam kam shong tang ha ka kyrdan ba ki bat, hynrei ka shong ha ka jinglah ban shim jingkitkhlieh bad ban ieng ryngkat bad ki paidbah ha ka por ba ki donkam, shuh shuh u la pynshlur bad ai mynsiem ïa ki nongïalam bad ki dkhot ba kin don ka mynsiem ban trei na ka bynta ka jingbit jingbiang ki paidbah bad ka imlang ka sahlang.
U bah Synrem u la ban jur ruh da kaba ong ba ka jingshim ïa ka jingbamsmai kum ki nongkitkam kam dei tang ka jingpyndep ïa ka rukom treikam, hynrei ka dei ruh ka jingkular ban trei, ban shakri bad ban ieng na ka bynta u paidbah, u la pynkynmaw ïa ki nongkitkam ba ka kyrteng bad ka kyrdan hapoh ka seng kim dei ban long ka lad ban pyni bor, hynrei ki dei ban long ka jingkitkhlieh ban shakri ïa ki paidbah, u la pynpaw ruh ba ka jingshisha jong ka jingtrei jong ka seng kan ym mih tang na ki ktien, hynrei kan paw shai lyngba ki kam bad ka jingshakri jong ki dkhot,u la kyntu ïa ki nongkitkam jong ki Circle ba thymmai ba kin long kiba jan sha ki paidbah, kiba sngap ïa ki jingeh jong ki paidbah bad kiba kloi ban shim bynta ha kaba wad ïa ki lad ki lynti ban pynbeit ïa ki jingeh kiba ktah ïa ka imlang sahlang, u la kyntu ïa baroh ki nongkitkam ba kin trei da ka jingshisha, ka jingkohnguh, ka jingïaineh bad da ka mynsiem jong ka jingshakri, ha kajuh ka por une u nongïalam ba rangbah jong ka HYC u la kyntu ruh ïa ki Circle kiba thymmai ba kin long kiba khlaiñ ha ryngkat ka jingiatylli bad pynshlur ruh ba kim dei ban duh mynsiem ne duh jingkyrmen haba ki iakynduh ïa ki jingeh ha ka jingiaid lynti jong ki.
Myn ha ka sngi saitjaiñ ka seng HYC East Jaiñtia Hills District ka la pynlonglong ïa ka jingialang pynbam snai ïa ki nongkitkam bad ki dkhot jong ki ar tylli ki Circle thymmai, ba kynthup ka Shiphew Shnong Circle bad ka Ñiaw Shnong Circle bad ong ruh ba kane ka dei kawei na ki sienjam jong ka HYC-EJHD ban pyniar shuh shuh ïa ka jingdon jong ki shnat treikam jong ka seng ha ki thaiñ bapher bapher khnang ban pynjan ïa ka seng sha ki paidbah.
Uwei na ki dkhot jong ka HYC CEC, u bah Purning Shabong, uba long kum u shong knor ba pyniaid ïa ka jingialang u la pynkynmaw ïa baroh ki dkhot shaphang ka jingdonkam jong ka jingduwai, ka jingdonkam jong ka jingiatylli bad ka jingtrei da ka mynsiem kaba khuid na ka bynta ka imlang sahlang bad kumta la sdang ïa jingïalang da ka jingdwai ha kaba la ialam ïa ka jingdwai da u bah Aite Sana, uba dei u Vice President HYC-EJHD bad la ioh ruh ïa ka jingkren lyngkot na u Chief Organising Secretary, HYC-CEC, uba la pynshlur ïa ki nongkitkam bad ki dkhot ba kin nang pynkhlaiñ ïa ka tnat treikam jong ka seng bad ban long kiba kloi ban trei bad shim bynta ha ki kam paidbah.
U President HYC-EJHD, u bah Preios Pale, ha ka jingkren jong u, u la ban jur ïa ka jingdonkam ban pynïar ïa ki tnat treikam jong ka seng sha ki thaiñ bapher bapher khnang ba ka jingshakri kan ym sah tang ha ki jaka ba la don lypa, hynrei kan poi sha ki paidbah ha ki shnong bad ki thaiñ kiba dang donkam ïa ka jingialam, ka jingiarap bad ka jingiatreilang.
Ha ka jingïalang la ioh ruh ïa ka jingkren na ki President jong ki ar tylli ki Circle thymmai, u bah Aite Sana, uba dei u President Ñiaw Shnong Circle Bad u bah Nangkiew Lamo, uba dei u President Shiphaw Shnong Circle kiba la ai ka jingsngewnguh ïa ka HYC-East Jaiñtia Hills District bad ka HYC-CEC bad ki la pynpaw ïa ka jingkut jingmut ban shim ïa ka jingkitkhlieh kaba la bynshet ha ki da ka mynsiem jong ka jingshisha bad ka jingaiti lut, ki la pynpaw ruh ba kane ka jingseng ïa kine ki Circle thymmai kan ym long tang ka jingpynbun ïa ki dkhot lane ka jingpynïar ia ka kyrteng jong ka seng, hynrei kan long ka lad ban pynjan ïa ka HYC sha ki paidbah bad ban pynsngew ïa ka sur jong ki paidbah, ki la kular ruh ban trei katba lah ryngkat ka jingkitkhlieh kaba la bynshet ha ki, ki la ong ruh ba kin shim ïa ka jingiatreilang bad baroh ki nongialam bad ki dkhot jong ka seng HYC.
La bynrap shuh shuh ba ka jingdon jong ki Circle ha ki bynta bapher bapher kan pynsuk ïa ka seng ban iohsngew ïa ka sur ki paidbah, ban sngap ïa ki jingeh bad ki jingdonkam jong ki paidbah. Ka seng ka ngeit ba ka jingtrei na ka bynta u paidbah ka dawa ïa ka jingkitkhlieh, ka jingkohnguh bad ka jingaiti lut. Kumta, ka HYC-EJHD ka kyntu ïa ki nongkitkam bad ki dkhot jong kine ki Circle thymmai ba kin trei da ka mynsiem jong ka jingshakri, ka jingieit ïa ka jaitbynriew bad ka jingkitkhlieh ïa ka imlang sahlang, khlem da wad ïa ka jingmyntoi shimet.
Ka HYC-EJHD ka ai khublei kyrpang ïa ki nongialam jong ka HYC-CEC, kumjuh ruh ki nongkitkam, ki President jong ki Circle thymmai, ki dkhot bad baroh kiba la wan ban ïashim bynta ha kane ka jingïalang, ka seng ka kyrmen ba ka jingwan jong kine ki ar tylli ki Circle thymmai, Shiphaw Shnong Circle bad Ñiaw Shnong Circle, kan long kawei na ki sienjam kiba kongsan ban pynkhlaiñ shuh shuh ïa ka HYC-EJHD bad ban pynïar ïa ka jingshakri paidbah sha ki bynta bapher bapher jong ka thaiñ.