Shillong, Ïaïong, 07: Uwei u riew trei mon sngewbha u Tennydard M Marak u la ujor FIR pyrshah ïa u Myntri sorkar bad u MLA ka Williamnagar u Marcuise N Marak halor ka jingkynnoh ba u pynkheiñ ïa ka Model Code of Condunct ha ka por Election.
ïa kane ka ejahar la ujor sha Williamnagar Police Station, East Garo Hills.
U Tennydard u la ai ruh ka jingujor sha u Chief Election Commissioner ka India ha ka 23 tarik Lber ryngkat ka kopi ba la phah sha u Myntri Rangbah duhka ri,u Myntri kam pohïing bad kumjuh ruh sha u Chairman ka NEDA. Ha katei ka jingujor u la kyrpad ba kitei ki bor kin shim khia ban pyndam noh ïa ka jinglong MLA u Marcuise namar u lehthok leh shukor ha ka por election bad ban pynlong election noh da kawei.
Ha ka ejahar la kynnoh ba u Marcuise u la sam ïa ka Report Card treikam jongu naduh u snem 2018-2022 ha ka por ba u leit ïalap eelction.
ïa kitei ki report card ba u la sam la shon ruh da u Jesubell Ch Marak Block Secretary ka NPP ha ka 3 tarik Rymphang katba ka Model Code of Conduct ka la treikam naduh ba ka Election Commission ka la pynbna ïa ka election ha ka jylla ha ka 18 tarik Kyllalyngkot. Kumta halor kane ka nongrim la dawa ban pynduh ïa ka jinglong MLA u Marcuise bad pynlong da kawei ka election.
U la ong ba u Marcuise ym dei tangba u thok ban pynbiej ïa ki padbah hynrei u la pynkheiñ ruh ïa ki kyndon ain. Nalor kata katei ka report card ruh ka long kaba thok bad shukor. U la kynnoh ba ka jingpynmih ha ka report card bad ka kam kam ïahap satia namar ki kam ki dei ki bym pat dep suda ne kiba ym don ei ei ruh.
