Shah kem ar ngut ki Khar Bangla ba thmu pynrung be-aiñ ïa ki parajait sha India

0

Shillong, Ïaïong, 07: Ki shipai BSF kiba la ïoh jingtip kaba bniah, ha ka sngi Balang ki la ïohkem arngut ki mynder ri na ka ri Bangladesh ïa kiba la tip kyrteng kum u Rahul Amin (37 snem) uba sah ha Sylhet bad u Md. Abdul Kasim (36 snem) uba sah ha Sunamganj District hajan ka jingkieng Dawki kaba don markhap bad ka West Jaiñtia Hills.
Hadien ba la ujor ejahar, ïa kine ki arngut la aiti noh sha ki Pulit jong ka Dawki Police Station ban leh ïa kaba donkam.
Kine ki arngut ki la rung beaiñ shapoh u pud u sam jong ka ri India da ka jingthmu ban shong duh ha ri India bad ban ïarap ïa kiwei pat parajait mynder ri na ka ri Bangladesh ban pynrung be-aiñ sha ri India.
Katkum ka jingphla jong u Rahul Amin, u la leit sha Guwahati ban leit shaw ïa ki 3 ngut ki mynder ri Bangladeshi kiba dang wan phai na Jammu & Kashmir da ka Train. Da kane ka jingïoh jingtip, ki shipai BSF ki la pyntip sha ka GRP Guwahati bad ïa ki lai ngut ki mynder ri na ka ri Bangladesh la bat noh ha Guwahati Railway Station.
Ha kawei pat ka liang, ki shipai BSF jong ka 172 Battalion kiba la ïoh ïa ka jingtip kaba bniah ha ka sngi Baar ki la ïoh kurup ïa kawei ka trok kaba kit ïa u kwai uba shongdor haduh T. 1.12 klur na ka thaiñ Umkiang, East Jaiñtia Hills District.
Da ka jingphla jong u nongniah la lap ksai ba ïa u kwai ba la wanrah na ka ri Myanmar la thmu ban pynpoi sha Barpeta na Silchar, Assam.
Hadien ba la ujor ejahar ïa u nongñiah bad ïa u kwai ba la ïoh kurup la aiti noh sha ki Pulit jong ka Umkiang Police Station ban pyndep ïa ki jingdonkam katkum ka aiñ. Kane ka dei ka sien kaba lai ban ïoh kurup bun bha u kwai na kane kajuh ka jaka.
Ha kawei pat ka jingpynap shrip, ki shipai BSF jong ka 4th Battalion, Meghalaya ki la ïoh kurup ïa ki jaiñ Sarees kiba shongdor haduh T. 13 lak na khappud jong ka Muktapur, West Jaiñtia Hills, ïa kiba la thmu ban shalan be-aiñ sha ka ri Bangladesh.
Ïa kine ki jaiñ ba la ïoh kurup la aiti noh sha ka ophis Custom Dawki ban leh ïa kaba donkam.

Leave A Reply

Your email address will not be published.