Jowai, Naitung 12: Ka Director General of Police (DGP) jong ka jylla, ka kong Idashisha Nongrang mynta ka sngi Thohdieng 12 tarik u Naitung, 2024 ka la wan ban pynkup burom ïa ki 71 ngut ki pulit AB/Driver Recruit Constables, ha ka ‘Passing Out Parade’ jong ka 2 Batch kiba la pyndep ïa ka jingshah hikai (Basic Training) ha 3rd MLP (1st IR) Battalion Sahbseiñ West Jaiñtia Hills District.
Hashwa ban pynkup burom la don ka jingïaid March Pass ba la shim bynta da kitei ki pulit kiba la dep ban shah hikai pyntbit, ha kane ka sngi la wan ban donlang naduh u Commandant ka 3rd MLP (1st IR) Battalion u Vivek Kanand Singh Rathore, u SP ka WJHD ma C. Syrti, ki heh pulit nalor kiba haïing hasem jong kitei ki pulit. La pynshong shit shuh shuh ïa kane ka sngi da ki jingrwai ba la shim bynta da ki pulit.
Na ka liang ka DGP kong Idashisha Nongrang kum ka kongsan haba ai jingkren ha kane ka sngi ka la ai khublei kyrpang ïa ka bor pynïaid jong ka 3rd MLP (1st IR) Battalion, ki la la lah ban pyndep ïa kane ka bynta ban ai jinghikai ïa kitei ki samla pulit, ba kin shim ïa ka lyngkor jong ka jingshakri ha ka kam Pulit.
Ka la ong kane ka 3rd MLP (1st IR) Battalion ka la buh jingeh bah ïa ka tnad pulit ka jylla ha ka jingïaid lynti, la sdang shwa ïa ka na Khliehtyrshi nangta la pynkynriah sha Shillong, nangta sha West Khasi Hills bad mynta ka la don ïa ka Headquarter kaba pura ha Sahbseiñ jong ka West Jaiñtia Hills District.
La ïathuh hadien 10 snem kata naduh u snem 2014 ki bor pynïaid kane ka 3rd MLP (1st IR) Battalion ki la lah ban ai biang ïa ka jinghikai ïa ki pulit ha ka sien kaba ar (2 batch), kine 71 ngut kiba la dep ban shah hikai ki kynthup naki Unit bapher bapher na West Garo Hills DFF, East Khasi Hills DEF, East Garo Hill DEF, 1st Meghalaya Police Battalion, West Jaiñtia DEF, Special Branch, CID Ribhoi, North Garo DEF, South Garo DEF bad 1 Driver Constable na ka ophis DIGP Eastern Range.
Ki don 8 ngut ki (Commandant Flower) 4 na Ribhoi, mar 2 ngut na North Garo bad East Garo Hill, la pyntip ba la ai jinghikai ha ki subject bapher bapher katkum ka rukom treikam jong ka tnad pulit.
Ka DGP ka la sam ruh ïa ki khusnam sha ki 6 ngut ki pulit ïa kiba la jied kyrpang napdeng kitei ki pulit kiba shah hikai, ïa ka nam Best in Arms Handling la ïoh da u ABRC Lectush Sangma na ka WGH DEF Tura, Best in Firing la ïoh da u ABRC Tengsrang Sangma na ka EGH DEF Williamnagar, Best in BPET la ïoh da u ABRC Sumardeiakor Niang na ka WGH DEF Tura, Best in PPT la ïoh da u ABRC Jenggibirth ch Marak na ka WGH DEF, Best in Exemplary Conduct la ïoh da u ABRC Octoborn Talang na WGH DEF Tura bad ïa ka Best in Rounder la ïoh da u ABRC Ynsateilang Khar-syntiew na ka EKH DEF Shillong.
