Shillong, Nohprah 06: Ka St. Anthony’s College, Shillong, da ka jingsarong ka la rakhe ïa ka jingïoh bad shah pynkup burom jong Dr. Sanku Dey, napoh ka tnat Statistics, ba la ïoh ka jingithuh kum top 2% jong ki scientist ha ka pyrthei baroh kawei bad ïa kane la pynbna bad pynmih paidbah da ka Stanford University, USA, ha u 2024. Kane ka jingïoh jingithuh jong u ka la long hapoh ki kam noh synniang sha ki kam wadbniah hapoh ka kam statistic bad academia.
U Dr. Dey u la pynmih ïa kumba 305 tylli ki kot wadbniah ne research publication bad u la lah ruh ban lum haduh 5,027 ki citation na ki riew shemphang jong ka pyrthei. Napdeng ki 223,153 ki scientist kiba la paw hapoh ka thup kyrteng u Dr. Dey u la poi ha ka kyrdan kaba 57,410.
Kane ka jingai jingkheiñ kadei kaba la pynmih ha ka 16 tarik u Nailur, 2024, hapoh ka Elsevier Data Repository, kaba dei ruh kum shi bynta ka “August 2024 Data-Update for ‘Updated Science-Wide Author Databases of Standardized Citation Indicators’.” Kane ka dei ruh na ki thup jong ki Citation, h-index, co-authorship-adjusted hm-index, kiba la thoh ha ki kot bad kiwei kiwei pat ki bynta.
Katkum ka kyrwoh ba la phah da kane ka jaka pule ka la ong ba ka dap da ka jingsarong haba u Dr. Dey u la ïoh ïa kane ka khusnam bad ai ruh ka jingïaroh ïa ki kam ba ratbah jong u ba la nohsynniang ïa ka jylla bad kumjuh ruh ïa ka St. Anthony’s College.
