Ngam da bun ktien ne put turoi than, ki nongkyrshan ki hun ïa nga kum u kyrtong: Fantin

Shillong, Nohprah, 06: Ki nongkyrshan jong ka National Peoples Party (NPP) Malki-Laitumkhrah Constituency ha ka sngi Balang da kawei ka sur ki la rai ban ai biang ka jingkyrshan ba pura ïa u Bah Fantin J.Lakadong uba long u MDC ba mynta kum u kyrtong sha ka elekshon jong ka Ingdorbar Thawaiñ ka Khasi Hills Autonomous District Council (KHADC) ka ban sa long.
Ïa kane ka rai, la shim ha ka jingïalang ba la sakhi lang da ki spah ngut ki nongkyrshan na ki shnong, ki dong baroh kiba hap hapoh ka Malki-Laitumkhrah Constituency, kaba long ha ka iingsah jong ka MLA ka East Shillong Constituency ka Dr. Ampareen Lyngdoh kaba long ruh ka Myntri jong ka Sorkar Jylla.
Nalor ki nongkyrshan, la don lang ruh u MLA/MDC barim jong ka Mawlai Constituency u Bah Embhalang Syiemlieh, ki nongïalam ba hakhmat, ki riewrangbah, ki longkmie bad ki samla.
U Bah Fantin haba kren ha kane ka jingïalang u la pynpaw ka jingsngewnguh ïa ki paidbah kiba la ai ka jingshaniah ha u hapdeng kine ki hynriew snem, kum u nongïalam, bad u la pynpaw ruh ïa ka jingsngew shngaiñ wat ha i por ba lyngkot ban wer ïa ka jingïalang hynrei la sakhi ïa ka jingkloi ki nongkyrshan ban sngap ïa ka jingkhot jong u.
U la pynsngew ba wat hapdeng ki jingpynthame bad ki khubor hamsaïa hynrei ki nongshong shnong jong Constituency bad wat sha kiwei ruh ki jaka ki shaniah ha ka nongrim baskhem jong ka NPP. U la bynrap da kaba ong, kiwei ki ïohlad ban kynthoh ïa u namarba u dei u briew u bym da bunktien ne put turoi than lyngba ki Social Media, hynrei ki kam na sha lyndet u la pyndep kum u nongmihkhmat, kaba pynlong ïa ki nongkyrshan ban ai jingmynjur biang ïa ka kyrteng jong u.
U Bah Embhahlang haba kren ha ka jingïalang u la ong ba un ai ka jingïatreilang ryngkat u Bah Fantin ha ka elekshon bad ka Dr. Ampareen ruh ka la pynsngew ba ïa ka kyrteng jong u Bah Fantin ladep ban phah sha ka NPP Shillong City. Ka la pynpaw ruh ïa ka jingsngewhun haba ïohi ba ki nongkyrshan ka NPP Block na ka Constituency ki ïahun lang ïa u Bah Fantin ban long biang u kyrtong ha kane ka election ban sa wan.
“Ai ba kiwei ki pynsawa da ki Social Media hynrei ma ka ryngkat u kurim jong ka, u Bah Fantin bad ki nongkyrshan kin pyni kham bun da ki kam,” ka la ong.
Haduh mynta na Laitumkhrah-Malki Constituency ki kyrtong kiba la paw kyrteng ban ïakhun ïa ka elekshon ki long ka Kong Deity Majaw na ka Voice of the People Party (VPP), u Bah Fantin Jospeh Lakadong na ka National Peoples Party (NPP) bad u Bah Peter Challam na ka Khun Hynñiewtrep National Awakening Movement (KHNAM).