Ka drama thaw sorkar mynta ka sien ha Meghalaya ka la kylla long kaba isangsot bad isynei shibun ïa ki seng riewlum jongngi. Ka UDP kam dei shuh ka nongbat shabi kumba ka long ha ka snem 2018 hynrei ka la kylla long pynban ka nongleit khrong shuki. Na ka saw ngut ki kyrdan Minister ha ka sorkar MDA-I sha tang ar ngut ki ïoh ha ka MDA-II bad lada ki ïai bteng ban leit kyrshan sa u snem 2028, kin sa pynbam nil(zero) syndon ka NPP ïa ki. Bun ki seng riewlum ki la shah pynhiar kyrdan lut ha kane ka sien mynta.
Ka UDP kaba la jop tang 6 ngut ei ei ha u snem2018 (bad kham hadien sha ka 8 seat)ka la ïoh doh kyndang haduh 3 ngut ki minister bad kawei ka post speaker. Mynta pat ka la ïoh haduh 11 ngut, ka ïoh pynban sa tang 2 ngut ki minister. Imat, lada ka ïai bteng ban kyrshan NPP sa u snem 2028, ka NPP kan sa pynbam Nil ne zero syndon ïa ka. Hynrei, katta ruh kim sngewthuh satia kat kane ka jingpynjah burom bad pynhiardan ïa ki.
Ki PDF pat ki la ïoh 4 ngut ki MLA ha u snem 2018, ka NPP ka ai minister tang uwei napdeng jong ki. Mynta pat ba ki jop tang 2 ngut, ka NPP ka la pynduh minister syndon ïa ki baroh 2 ngut. Nalor ba ka la pynshong lypa ïa ki ha tnum kali, ki ïoh shong shisha ruh tang da ka lyngknot (Chairman/Vice Chairman) kumba la dep maham lypa da uwei u nongïalam ka NPP ïa ki. Hynrei, wat lada ki la shah sloit ïa ka iktiar bad pynhiar kyrdan haduh katne ruh hakhmat ki paidbah, katta ruh kim sngewthuh satia ïa la ka kyrdan lajong.
U Sing te ba u kloi ban leit shong kali MDA noh wut wut, um duhnong eh, u ïoh hi uwei na ki 2 ngut kumba ïoh ha u snem 2018.
Ha u snem 2018, ka sorkar MDA-I, la thaw ha ïing u President ka UDP ha kato ka por, u (L) Dr. Donkupar Roy, u Himanta, u Conrad Sangma, u Dr Mukul Sangma ki leit pah leit khroh ïa u President ka UDP ban thaw ïa ka sorkar. Baroh ki peit khmat bad hap kohnguh ïa ki kyndon jong ka UDP. Mynta ka sien pat, ka la i jah burom hi khait namar ki seng riewlum ki leit pah, leit nguh leit dem tang ban don lang ha ka sorkar ban ïoh dohkyndang lem da ka doh shyieng ne da ka doh kyntait ruh imat kampher ïa ki.
Mynta la eh bha ïa ki. Lada ki don lang ha ka sorkar ruh tang 2 nagut ki minister kin shah rkhie beiñ ha ki paidbah bad lada kin ran dien noh ruh kin shah kynshi-kyneh ha khmat ki paidbah ba bun. Ki la pynjah burom bad pynhiar dor ïa ka kyrdan bad ka nam jong ki seng riewlum ha ka jylla Meghalaya jong ngi. Kumno ki leit ai jubab hakhmat ki paidbah ha ka MDC Election kaban sa long ha u bnai March 2024? Bun ki nongkyrshan ka UDP na ki unit bapher bapher kiba la ïa pynpaw ka jingsngew mong ba ki shah pynjah burom ei kha ma kha ha ki nongïalam jongki. Lada ka long ha kane ka rukom, ki seng riewlum ha Meghalaya mynta kin sah sa tang ka shynrong khlem ka met bad ka mynsiem(principles) bad ka long ruh ka jingleh raiñ bad jingjah burom hakhmat ka pyrthei baroh.
