Shah pom pyrthat 11 tylli ki masi ha Rangthong, shah ktah 8 tylli ki longïing

Mawkyrwat, Jylliew, 18: Ka jingwan jong u lapbah lapsan ha kine ki khyndiat sngi ka la pynlong ïa ka khyndew ban shong synjor bad shong jem bad na kane ka daw bun tylli ki longïing ki la shah ktah bad shah tap ha ka jingtwa khyndew.
Halor kane ka jingjia, u District Management Authority Officer (DMAO), South West Khasi Hills District Dr. E.S. Langshiang, ula ïathuh ba katkum ka jingïoh lum jingtip haduh mynta ki longïing kiba la shah ktah ki don 8 tylli, kata, ar tylli ha Lower Mawpud, lai tylli ha Dommawleiñ, ar tylli ha Sarin bad kawei ha Nongpdengkenbah-Nongthymmai.
U la ïathuh ruh ba ka la don ruh ka jingtwa khyndew ha surok Rangthong sha Sarin, ka jingshah tap khyndew ki lynti ïaid kjatkjat ha Mawpud bad Lower Mawpud.
“Kine ki jingjia ki lah ban jia hapdeng ka por 2:00 bje haduh 5:00 baje mynstep mynta ka sngi,” la ïathuh u Dr. E.S. Langshiang.
Ha kawei pat ka jingjia, u Dr. E.S. Langshiang u la ong ha ka shnong Rangthong haduh 11 tylli ki masi jong u Bah Tonel Ïawphniaw ki la ïap na ka jingshah pom pyrthat.