Shillong, Risaw, 27: Ki Pulit jong ka Sadar Police Station ha ka sngi Palei ki la khot hajir sa ïa u Babu Babitdor Hujon uba bat ïa ka kyrdan Asst. finance Secretary jong ka Meghalaya Government Lower Primary School Contractual Teacher’s Association (MGLPSCTA) ban tohkit ha kaba ïadei bad ka jingtur paidbah jong ki nonghikai skul Kontrak sha ophis Main Secretariat ha ka 6 tarik mynta u bnai na ka bynta ban dawa thungkam biang ïa ka Sorkar Jylla.
Kum ban shu pynkynmaw hangne, ki nonghikai skul Kontrak kiba la shah wengkam ha u bnai Kyllalyngkot, 2021 ki la tur paidbah sha ophis Main Secretariat lem bad ki khun ki kti ban dawa ïa ka Sorkar ba kan thungkam biang ïa ki hynrei kane ka jingleit tur paidbah ka la wanrah pynban ka jingsngewsih hadien ba ki Pulit ki la kawang da ki bom pynsat khmat.
Ha ka jingïakren bad ki lad pathai khubor ynda la mih na Sadar Police Station, u Babu Babitdor u la pynpaw ïa ka jingsngewsih halor kane ka jingshah khot hajir ha ki Pulit da kaba kam ba ki Pulit ki la pyrshang ban kynnoh beit ba ka jingbakla ka dei na ki nonghikai skul kontrak.
U Babu Babidor u la kyrpad ïa ka Sorkar Jylla ba kan weng noh ïa ki kyndon ba la pyngat pyrshah ïa ki nongïalam jong kane ka kynhun ki nonghikai skul Kontrak bad ong ruh ba ki nonghikai ba la shah wengkam kim kwah eiei hynrei ki kyrpad ïa ka Sorkar tangba kan thungkam biang ïa ki sa shisien khnang ba kin dup lah ban bsa bad ban pyndap ïa la ka ïing ka sem.
