Shillong, K’ Lyngkot 11: Uwei u briew uba la shah kynnoh ba u la leh beijot ïa ka khynnah kaba dang 12 snem ka rta u la shah kem noh ha ki pulit, ong ka khubor ba la ïoh na ki Pulit ha ka Sngi saitjaiñ.
U Superintendent of Police jong ka North Garo Hills u Swapnil Vasantrao u la ïathuh ba ïa kane ka jingjia ladep ban register case hapoh ka Protection of Children from Sexual Offences Act (POCSO).
U Heh Pulit u la ong ba ïa ka lanot la pynkit noh sha hospital na ka bynta ban pyndep ïa ka medical examination.
Kane ka jingjia, kaba la jia ha ka 27-28 tarik, Nohprah, 2024 ka la paw pyrthei hadien ba ki artylli ki sengbhalang kiba kynthup ïa ka A·chik Indigenous Justice Initiative Forum (AIJIF) bad ka A·chik Youth Welfare Organisation (AYWO), ki la ïathuh halor kane ka jingjia bad ha kajuh ka por ki la pynrem jur bad ki la kyntu ba dei ban pynshitom ïa utei uba la shah kynnoh donkti, katkum ki kyndon jong ka aiñ bad ïa kane ki la pynpaw ha ka shithi ba ki la phah sha ka District Child Protection Officer.
Ha kajuh ka por, kine ki sengbhalang ki la pynshai ruh mynta sngi ba kane ka dei ka jingjia kaba la pyrshang ban leh beijot hadien ba utei u ba la shah kynnoh u la teh ïa ki kti bad ki kjat jong katei ka khynnah bad ba u la leh kynshleiñ, leh khlem akor ïa ka.
Halor kane ka jingjia ka la don ruh ka jingbakla batai ïa ka jingujor jong kitei ki ar sengbhalang kaba ki la phah sha ka District Child Protection Officer bad la thoh ba kane ka khynnah ka la shah leh beijot bad ong ba kane ka dei ka jingjia kaba shyrkhei.
