Nongpoh, K’Lyngkot 23: U Engineer ka PHE cum Member Secretary, JJM Ri-Bhoi Circle u la pyntip ba 2 ngut ki Chairman ka Village Water and Sanitation Committee, ba kynthup ïa u Bah Silverster Marbaniang jong ka shnong Nartap bad u Bah Bandari Ryntathiang jong ka shnong Mawpun Kshaid, Ri-Bhoi District ki la shah jied kum ki Special Guest ban leit shim bynta haka jingrakhe ïa ka Republic Day haka 26 tarik mynta u bnai ha nongbah Delhi.
U Bah Silverster Marbañiang, Chairman jong ka VWSC Nartap bad u Bah Bandari Ryntathiang, Chairman jong ka VWSC Mawpun Kshaid, ki la don ka bynta kaba khraw ba baroh ki longiing haki shnong jong ki, ki ioh ïa ka umbam umdih kaba khuid ba suba bad kaba shngaiñ bad kum ka komiti shnong ka lah ban pyntreikam bha ban lum ruh ka bai bnai shisien shi bnai bad kumjuh ruh ban rejistar ïa ki longiing ba thymmai ban weng ïa ki jingeh jong ki paidbah bad khamtam ban pynneh pynsah ïa ki tyllong um.
Shuh shuh, la ïathuh ruh ba lyngba ka jingkyrshan jong ka Jal Jeevan Mission, ka VWSC jong kine ki ar shnong lem bad ki paidbah nongshong shnong, ki la shim jingkitkhlieh halor ki jingeh kiba ïadei bad ka um da kaba pyndonkam ïa ki lad jingïarap, ban pynbha ïa ka rukom pyntreikam bad ki lad ban sumar bad ïada ïa ka um.
Kum ban shu kdew hangne ha ki snem kiba mynshwa, ki nongshong shnong jong ka Nartap bad Mawpun Kshaid ki mad ïa ka jingeh kaba khraw ha kaba ïadei bad ka um bam namar ka jaka tan um ka long kaba jngai kumba 20km na shnong jong ki, kaba la pynlong ïa ki nongshong shnong ban hap shañiah haki um ba shut hied bad ki bun na ki longkmie bad ki samla pat ki la hap ban pynlut bun kynta ban leit tong um.
Hynrei mynta, lyngba ka jingpynpoi ïa ki kor um ha man la ki thliew ïing ka la wanrah shibun ka jingkylla ha kitei ki shnong, ka la pynduna ïa ka por ban leit tong um, ha kaba ki samla pule jong katei ka shnong mynta ki la lah ruh ban pynlut bun ka por haka pule puthi jong ki bad kiwei ki kam ki jam.
