Shah tuh laptop, Ipad bad kiwei ki jingjia

Shillong, K’ Lyngkot 23: Ka khubor ba la ïoh na ki pulit la ïathuh ba u Rohit Kumar u la phah ka jingujor ba ha ka janmied jong ka 21 tarik mynta u bnai ki runar bym lah ban ithuh ki la prong hapoh ka iing jong u Shankarlal Sharma kaba ha Demseiñïong, Lower Arbuthnot Road, Laitumkhrah, Shillong ha kaba ki la tuh ïa kawei ka laptop, kawei ka Ipad, bad ki jingdeng kiba shongdor kumba T. 5 lak bad kumjuh ruh ka pisa T. 30,000/-.
Ha kawei pat ka jingjia ki pulit ki la ïathuh ba u Inayat Shah, Proprietor, Kashmir Emporium, GS Road, Shillong u la phah ka jingujor ba ha ka 21 tarik mynta u bnai, ki runar bym lah ban ithuh ki la prong hapoh ka dukan jong u bad ki la tuh ka pisa kumba T. 2.3 lak. Sa kawei pat ka jingjia ki pulit ki la ïathuh ba ha ka janmied jong ka 20 bad 21 tarik mynta u bnai, ki runar bym lah ban ithuh ki la tuh ïa ka thuk thuk kaba don nombar ML-05AC-1159, na surok kaba ha Fourth Furlong, Polo, Shillong.