Shah ieh beiñ ka rilum Jaiñtia ha ka Sorkar, ïalap election ka party thymmai ha ka jingngeit ñiam: Pala
Sngewskhem ban jop bun ka Congress ha KHADC bad JHADC

Jowai, K’lyngkot 14: U President jong ka Meghalaya Pradesh Congress Committee (MPCC) Bah Vincent H. Pala ha ka sngi Baar ula pynpaw ka jingsngewskhem ba ka Congress ha ka elekshon MDC sha ka KHADC kan jop palat 17 Seat, katba ha JHADC ka Congress kan jop bun namar la ïohi ba kiwei ki seng saiñpyrthei kim shym la lah ban ai jingshakri hok ïa ki paidbah kat haduh ba la poi ka jingduh tulop da ki phew phew bnai jong ki nongtrei bad mynta ki paidbah ki la phai khmat biang sha ka Congress da kaba sngewskhem ba ka party kan jop ïa ka election MDC 2025.
Ha ka jingïakren bad ki lad pathai khubor hadien ka jingïalang pynithuh ïa ki 18 ngut ki kyrtong ha CTC Orchid Thadlaskeiñ, West Jaiñtia Hills District ki ban ïakhun ïa ka election MDC sha ka JHADC u Bah Vincent H. Pala ula ong ka ri-lum Jaiñtia ka la shah ieh beiñ mynta ha baroh ki liang naduh da kaba shah pynduh ban pynrung ïa ka ktien Pnar ha ka State Anthem da ka sorkar MDA kaba ïalam da ka National Peoples Party (NPP) bad ha ka jaka ban rwai ïa ka Ri Khasi Ri Jaiñtia la hap ban rwai tang Ri Khasi da kawei ka party thymmai.
“Kane ka la long kumba ïuhroit ïa ka rilum Jaiñtia kaba la sdang ban hiar arsut bad kane baroh dei na ka daw ka jingbymtip ban jied ïa ki nongmihkhmat,”, la ong u Bah Pala.
U la ong kane ka dei ka sngi sah kynmaw ïa ka Congress kaba la ïoh ban pynithuh ïa ki kyrtong kum shi bynta ban pynshong shit ïa ki paidbah nongkyrshan bad ong ruh ba ka hok jong ka riti ka dustur ka shong ha ka District Council kaba don ïa ka aiñ ban ïada lyngba ka Six Schedule.
Shuh shuhu la ong ruh lada ka Congress ka wan ha ka bor kan peit bniah ïa ka bha ka miat jong ka Council katkum ki kyndon aiñ ba la ïoh naduh ki por mynshwa.
U la kynthoh ruh da kaba ong ba bun ki party mynta khamtam ka party thymmai ka la ïalap elekshon ha ka rukom jong ka jingngeit ñiam bad kane ka lah ban buh jingma shikatdei eh ïa ka jylla.
U la kyntu ïa ki paidbah ba kim dei ban shah ïalam bakla ha ka jingsngew ñiam namarba ha ka kam synshar ka khadar bad ka jingleh ñiam ka ïaid la ka jong ka jong bad pynpaw ruh ba ïa kane ka rukom ïalap la sdang ban pyntreikam nyngkong eh da ka BJP.