Shillong, Naitung 10 : Ka Myntri ka tnad ka Koit ka Khiah jong ka sorkar jylla, Dr. M Ampareen Lyngdoh ha kane ka sngi Nyngkong ka la kular ba kan pynsngew sha ka shkor jong u Myntri Rangbah ka Jylla halor ka jingduna palat ka jingsiew kaba ki ASHA ha ka jylla ki ïoh baroh shi katta.
Ïa kane la ïathuh da ki nongïalam jong ka Meghalaya ASHA Workers’ Union (MAWU) hadien ba ki la dep ban kynduh ïa ka Myntri ban pynsngew halor ki lai tylli ki mat kynthup naduh ka jingdawa ban pynrung pura ïa ki ASHA ha ka skim MHIS bad khamtam eh ban don noh da ki kyndon halor ka jingweng kam khlem daw da ki nongïalam shnong ïa ki ASHA.
Haba kren sha ki lad pathai khubor ka Adviser jong ka MAWU ka Kong Sonny Kharjana ka la ïathuh ba haka jingïalang bad ka Myntri, ki la pynsngew ïa ka jingdonkam ban shah kynthup noh hapoh ka Minimum Wages ïa ka bai nong ba kidei ban ïoh namar bai sngi ka long ka ba rit palat.
“Haba ïadei bad kane ka jingdawa na ka liang ka Myntri ka la pynsngew ba kan ïakren ïa kane bad u Myntri Rangbah kumno ban leh halor ka jingdawa ban kynthup noh ïa ka bainong jongngi hapoh ka Minimum Wages,” la ong ka Kong Sonny.
Ka Kong Sonny kala ïathuh ruh ba haka jingïalang, ka MAWU kala dawa ruh naka myntri ka tnat ka koit ka khiah ban kynthup i aki nongtrei ASHA hapoh ka skhim MHIS ban ïoh ka jingkyrshan kaba 100 persen ka bai dawai.
Ka la ïathuh ba naka liang ka tnat ka koit ka khiah ka la mynjur ban pyntreikam ïa kane bad yn pynbiang ruh da ki ID ïa ki ASHA khnang ba kin lah ban ïoh jingmyntoi naka shkhim MHIS ha ka por ba ki leit ban shah sumar.
“Nalor kine, ka MAWU ka la kyntu ïa ka Myntri ban pynmih da ka jingpynbna ban ithuh ïa ki nongtrei ASHA khnang ba ki nongtrei kim dei ban shah wengkam khlem kano kano ka daw kumba la jia ïa kiwei ki nongtrei ASHA,” kala ong.
Nalor kane ka MAWU ka la dawa ruh na ka Myntri ban kyntiew noh ïa ka bai nong ki ASHA Facilitator namar ka bai kali kaba ki ïoh ka long tang 400 tyngka namar bunsien kine ASHA Facilitator ki hap ban leit sha ki shnong kiba jngai bad hap ruh ban shu wai kali ban pyndep ïa ka kam ba la bynshet ha ki da ka tnad ban pyndep.
