Shillong, Nohprah, 18: Ka Jaiñtia National Council (JNC) ka la dawa ïa ka Jaintia Hills Autonomous District Council (JHADC) ban ai jingpynshai halor ka jingaiti sha ki riewshimet ban pynïaid ïa ki Check Gate ka tnat Forest.
Ka jingdawa jong ka seng ka long kum shi bynta ka Save Jaiñtia Mission (SJM) kaba dang shu dep pynbna paidbah dang shen ha ka 14 tarik mynta u bnai kaba long kum kawei na ki mat ban pynkhlaiñ ïa ka jingtreikam jong ka JHADC.
“Na ki tyllong jingtip ka seng ka la ïoh jingtip ba ka JHADC ka la aiti ban pynïaid noh ïa ki Check Gate jong ka tnat Forest sha ki riewshimet bad kane ka jingpynïaid kan long tang kum ka jingpyrshang ne kan long long shi junom,” la buh jingkylli u President ka seng u Bah Sambormi Lyngdoh ha u kyrwoh ba la phah sha ki lad pathai khubor ha ka sngi Balang.
U President ka seng u la pynthikna ïa kane ka khubor lyngba ka jingïakren bad u Excutive Member uba khmih ïa ka tnat Forest u Bah Lasky Rymbai bad la ïathuh ba ba ka daw kaba pynlong ïa ka JHADC ban aiti pynïaid sha ki kynhun shimet ïa ki Check Gate ka dei halor ka jingjur shaba palat ka bamsap ha kine ki Khyrdop bad ka jingïoh lum khajna na kine ki khyrdop ka long kaba duna bha.
“Ka jingthmu hi ka long ban ïanujor haduh katno ka jingïapher ka jingïoh jinglum khajna na ki Khyrdop, la ong u EM ka JHADC,” ïathuh u President ka JHADC.
“Ka seng ka pynpaw ruh ïa ka jingpyrshah kaba jur ïa ka jingleh jong u Executive Member bad u Chief Executive Member (CEM) ka JHADC halor kane ka bynta bad ong ruh ba lada ka JHADC ka shem ba ka jingïoh lum khajna na kine ki khyrdop ka long ka bym biang ka dei ban thung noh da ka jingtohkit bad lada ki Ophisar ne ki nongtrei kim long kiba bit ladei ban bujli noh da kiwei pat hynrei ban shu aiti noh sha ki riewshimet ban pynïaid ïa ka kam imat ka don aiu re aiu sha lyndet,” la kynthoh u Bah Sambormi.
