Nongpoh, Jymmang 18: Ki Rangbah hapoh ka lama ka Synjuk ki Rangbah Shnong Ri-Bhoi District mynta ka sngi kila leit ban ujor syndon sha u EM Elaka u Bah Jambor War ha District Council ban pynpaw ka jingpyrshah halor ka jingpynmih hukum ka Hima Mylliem katkum ka shithi No.MS/V-37/2016-22/138-39 dt Shillong the 08,April,2022 kaba la hukum ïaki Rangbah Shnong baroh ba lada don kiba thmu ban plie ïaki Guest House, Resort, Hotel, Petrol Pump, bad kiwei kiwei ki kam khaii ba ki dei ban ioh ka No Objecion Certificate shuwa naka Hima.
Ki nongïalam ka Synjuk hapoh ka jingïalam u Bah BB Makdoh Chairman, Bah PB Sylliang Secretary bad u Bah Sen Thabah mynta ka sngi kila leit ruh ban aiti da ka jingthoh sha u EM ka Elaka u Bah Jambor War ba katei ka hukum jong ka Hima Mylliem sha ki Rangbah Shnong ka long kum ka jingpynduh bor ïaka iktiar ki Rangbah Shnong ba kino kino ki kam khaii dei ban ioh NOC naka Hima ym naka Dorbar Shnong.
Haba kren sha ki lad pathai khubor mynta ka sngi u kitei ki nongïalam kila pynpaw ba naka liang ka Synjuk hadien ka jingïasyllok bad ki Rangbah Shnong kila pynpaw ka jingpyrshah jur halor kane bad da kawei ka jingmut kila rai ban nym pdiang bad ban kyntait war ïa katei ka hukum.
Kila pynpaw ruh ba kane ka jingleh jong u Syiem ka Hima Mylliem ka long kumba knieh noh ïaka bor bad ka iktiar jong ki Dorbar Shnong namar tang ban ai NOC ïa kawei na ki kam ruh hap ban pan bor na u Syiem bad kane ka buh jingeh ruh ïa kiba bun ki khun samla kiba pyrshang ban ieng hala ki jong ki kjat da kaba seng kam seng jam namar tang naka bynta ka NOC hap ban pynlut da ka nongsngi ban leit pan na u Syiem ka Hima.
Naka liang jong ki kila kyrpad ruh sha u EM ba dei ban weng noh mardor ïa katei ka hukum bad naka liang u EM u la kular ban shimkhia ïa katei ka kam.
