Nongpoh, Jymmang 18: Ki nongïalam ka Federation of Khasi Jaiñtia and Garo People (FKJGP) sengkmie bad North Khasi Hills District hynnin ka 17 tarik Jymmang, kila hiar sha ka thaiñ Umden naka bynta ban pynskhem ïaki nongkitkam ba thymmai jong ka Umden Circle jong u snem 2022-25 hadien bala kut ka samoi treikam jong ki nongkitkam barim ban pynkhlaiñ ïaka jingtreikam jong ka seng.
Ha katei ka jingpynskhem ïaki nongkitkam ba thymmai ka Umden Circle la wan ban don lang da u Bah Dundi C Khongsit Working President ka FKJGP sengkmie, Bah Lui Lyngdoh President ka FKJGP North Khasi Hills District, Bah Lumlang Mawnai Senior Vice President, Banroy Wahlang Assistant Information Secretary bad kiwei kiwei.
Ki nongkitkam ba thymmai jong ka FKJGP Umden Circle naka bynta ka samoi treikam jong u snem 2022-25 ki kynthup ïa u Samla S Syiem President, Successor Khymdeit Vice President, Apkyrmen Trang General Secretary bad kiwei kiwei bala pynskhem da u Bah Dundee C Khongsit Working President ka FKJGP sengkmie.
Haba kren ha katei ka sngi naka liang u Bah Dundi C Khongsit hadien ka jingpyn-skhem u la pynpaw ka jingsngew kmen ba ka mynsiem ieid ri haki khun samla ka dang rhem katba dangmih ki sngi, bad kum ka seng ka dang don ka jingangnud ban dang pyniar bad pynkhlaiñ ïaka jingtreikam sha man la ki jaka ba ki dkhot kin long kiba peitngor naka jingwanrung kyrthlep jong ki mynder khamtam u pud u sam bad katno ka long ruh ka jingkmen kaba khraw ban iohi ba kitei ki samla haka sien ba nyngkong eh ba ki pynïasoh bad ka FKJGP.
U la kyntu ruh ïa kitei ki nongkitkam ba thymmai ha katei ka sngi ba kin long ki shipai kiba don ka jingkitkhlieh naka bynta ka jaitbynriew, bad khamtam ban long ruh ki nuksa ïaki khun samla ban pyni sha ka pyrthei ïaka jingtrei kam jong ki ban peit ïaka eh ka shon haka imlang ka sahlang.
