Khliehriat iaiong 18: U Executive Engineer jong ka tnat P.W.D (Roads) N.E.C Division, Khliehriat ka buh ka jingpynbna ba yn khang shwa mynta shipor ïa ka jingkieng kaba don hajan shnong Shymplong namar ki nongtrei kin sdang noh ïa ka jingmaramot ïa katei ka jingkieng kaba don ruh ha ka thaiñ khappud.
Kum ban shu phai dien, kawei ka jingkieng kaba ju iaid ki paidbah ha thaiñ khappud ha shnong Shymplong, hajan Sonapyrdi, hynnin ka sngi ka la dkhut ar laing bad ka um kaba lat-lat ka la rong noh ia ka jingkieng, ka jingdkhut noh kane ka jingkieng mynta kala buh jingeh haduh katta katta ia ki paidbah ha ki thain khappud kiba namar na kane ka jingkieng ki paidbah jong ka shnong Huroi, Hingaria, Lejri, Lahalein bad kiwei kiwei ki shnong ba khappud ki jing iaid lyngba.
Namar ka jingjur palat u slap, ka um nalor ki lum ka la wan ban lynshop bad pynjulor lut ploiñ ïa kane ka jingkieng ha shnong Shymplong, mynta ki paidbah ki kynduh jingeh ha ka leit ka wan bad ha ka kit ka bah, namar lyngba kane ka jingkieng ki kali jong ki thain khappud ki iaid lyngba bad kit ia ki mar bam, kit ruh ïa ki mar rep bad pynpoi sha ki jaka ïew.
