Sha ka 43 ngut kynjoh ki kyrtong kiba thep kyrteng ban ïakhun elekshon na ki Constituency ka EJH

Khliehriat, Rymphang 01: Ka jingwan thep kyrteng ki kyrtong ki ban ïakhun ïa kane ka election MDC sha Jaiñtia Hills Autonomous District Council mynta ka la kot sha ka sawphew lai ngut na East Jaiñtia Hills District, ha kaba myn ha ka 30 tarik u kyllalyngkot ki la wan poi khatwei ngut, myn ha ka 31 tarik kyllalyngkot ki la wan poi arphew san ngut bad mynta ka sngi ka 1 tarik u rymphang ki la wan poi hynñiew ngut.
Ki hynñiew ngut kiba la wan thep kyrteng mynta ka 1 tarik u rymphang ki kynthup u bah Manbha Lyngdoh na ka party BJP, u ban ïakhun na ka 20 Muthlong Sohkymphor, katba na Tuber Wapungshnong Constituency pat u bah Kyrshan Dkhar kum u kyrtong khlem seng ne Independent Candiadate, i kong Violet Lyngdoh, iba dei kum ka MDC ba rim mynta ka kynti i mih kum ka kyrtong khlem seng ban iakhun na ka 23 Rymbai Khliehriat Constituency, u bah Arbor Hima Darnei na ka party NPP un ïakhun na ka 27 Saipung Nongkhlieh Constituency, u bah Desous Pohshna, u MDC ba rim mynta u ieng kum u kyrtong shi met bad un ïakhun na ka 28 Narpuh Constituency, u bah Marshall Biam, kum u kyrtong shimet u ïakhun na ka 29 Bataw Lakadong Constituency, u bah Joinriwell Pyrtuh, u MDC ba rim mynta u mih na ka party UDP bad ïakhun na ka Bataw Lakadong Constituency.
Haba kren sha ki pathai khubor ka MDC barim jong ka Rymbai-Khliehriat, ka kong Violet Lyngdoh ka ban ïakhun biang mynta ha kane ka MDC Election, ka la ong “Ka daw kaba pynlong ïa nga ban ïakhun biang ha kane ka election MDC, namar ka Khliehriat kumba ngi tip ka dei ka Headquarter jong ka East Jaiñtia Hills District, te donkam ban wanrah ïa ki tnat treikam jong ki ophis kiba don hapoh ka JHADC na ka bynta ban pynsuk ïa ki paidbah ka district ha kaba ïadei bad kino kino ki kam kiba ïadei bad ka JHADC”
Ka pynpaw ruh ka jingsngew khia halor ka jingshah ieh bieñ ka Town Committee kaba dei ka committee ba kaba khmih kyrpang ïa ka khuid ka suba kumta ka don ka jingangnud ban pynkhie im biang ïa kane ka Towm Committee kaba don hapoh ka district bad ruh lada shah ka lad kan ialeh ruh ban pynhap lang sa ïa kiwei kiwei ki shnong ruh bakin hap hapoh ka Towm Committee kum ka Ladrymbai, ka Byndihati,Nongthymme, Kairang.
“Ka don ruh ka ïew ha Khliehriat, ba ju tip ruh kum ka ïew Pangkad kaba peit bad khmih da ka District Council bad ka la shah ieh beiñ namar ym don kiei kiei ki jingioh na ka council te ynda nga poi sha ka thong nga don ban kren ïa kane ka mat ruh hapoh ka council” ong ka kong Violet Lyngdoh.
U bah Desous Pohshna,u ban ïakhun na ka 28 Narpuh Constituency, u la ong ba “ Ha u snem 2014 nga la long kum u MDC ha u 2017 kum u CEM, te kane ka jingkwah jong nga ban ïakhun biang kum u MDC ka long ba nga iohi ïa ka jingtlot ki bor jong ka JHADC bad ka jingangnud jong nga ka long ban nang pynkhlaiñ shuh shuh ïa ki bor jong ka District Council, namar ha ka por ba nga long MDC ngi iohi ba ka sorkar ka la pynmih ïa ka Ordinanace na ka bynta ki Waheh Shnong bad ngi la ïalehshitom banthaw ïa ka Bills na ka bynta ki Waheh Shnong bad mynta ka la long aiñ haduh mynta, ki dang don shibun ki aiñ kiba ïadei bad ka khyndew ka shyiap ruh bad kiwei kiwei kiba dang donkam ban pynbit pynbiang bad pynbha shuh shuh bad lada ki paidbah ki dang pynjop ïa nga ha kane ka kynti kine baroh yn pynurlong khnang ban pynkhlaiñ bad pynbha ïa ki aiñ kiba don hapoh ka Sixth Schedule”
U kytong Shimet u ba iakhun na ka 29 Bataw Lakadong Constituency, u bah u bah Marshall Biam, u la pynpaw ka jingsngew khia halor ka jingshah ieh beiñ ki shnong kiba don ha ki thaiñ khappud namar hapoh kane ka constiyuency ki don bun tylli ki shnong kiba don ha khappud, u la ong ba lada u poi sha ka thong un ialeh ban wanrah ïa ja bha ka miat ha ka constituency hi baroh kawei .
“Nga thrang naduh mynsiem ban wanrah ïa ka roi ka par hapoh ka constiyuency, namar dang bun ki jingduna bad bun ki nongmihkhmat kiba ju mih na katei ka constituency kim ju kham shim khia ïa ki shnong ha khappud, kumjuh ruh ka thong jong nga lada nga jop ka long ban rat dyngkhong ïa ka bamsap, ban rat dyngkhong ïa ka jingsahdien ki shnong ki thaw namar nga isynei ïa ki paidbah, nga synei ruh ïa kito ki nonghikai skul jong ka district council ki bym ioh tulop kumjuh ruh ki nongtrei ka district council ki bym ioh tulop, hangne donkam ka jingïatreilang kumta nga kwah ban ïatreilang bad ki heh ka district council ban kyntiew ïa ki shnong bad ruh na ka bynta ban pynkhlaiñ ïa ka Sixth Schedule” ong u bah Marshall Biam.
Na ka liang u bah Marshall u pan ïa ka jingkyrshan lang jong ki paidbah jong ka Bataw-Lakadong Constituency ban ioh ka lad ban ïatreilang ban wanrah ïa ka bha ka miat ha ki shnong ki thaw.