Sha 54 ki longïing ba duna, noh Synñiang ki ar ngut ki samla na shnong ka Shait Shait Umoid

Mawkyrwat, Jymmang 17: U samla Krishna Syiemlieh bad u samla Tirotsing Mawlong, kiba dei ar ngut ki samla rangbah na ka shnong Shait Shait Umoid, South West Khasi Hills District, mynta ka sngi 16 tarik u Jymmang, 2026 ki la noh synñiang da ki jaiñ sha 54 tylli ki longïing kiba duna ka ïoh ka kot hapoh ka shnong.
Haba kren ha kane ka sngi, kine ki ar ngut ki samla ki la pynpaw ba ki la don ïa kane ka jingthmu naduh mynshwa ban ïarap ïa kiba duk ba suk bad kiba duna ha ka ïoh ka kot. Hynrei, namar ba kim pat dei kiba la biang pura ha ka liang ka jingïoh jingïarap, ka la shim por ïa ki ban pyndep ïa kane ka thong.
Ki la ong ruh ba kane ka jingnoh synñiang kam dei tang ka jingïarap ban pyndep ïa kata ka jingthmu, hynrei ka long ruh kum shibynta ban pynjan ïa ka jingïadei paralok para shnong, ban wanrah ïa ka jingïatylli bad ban pynskhem ruh ïa ka mynsiem jingïasynei bad jingïarap para briew, khamtam ïa kito kiba donkam jingïarap.
Ha kane ka sngi la ïa donlang ruh u Bah Kranly Wahlang uba dei u Rangbah Shnong ka Shait Shait Umoid, u Bah D. Kharbani, Secretary Shnong ka Shait Shait Umoid ryngkat bad kiwei pat ki nongkitkam shnong bad ki paidbah shUmoi ha kaba na ka liang jong ki ki la ai ka jingïaroh ïa kine ki arngut ki samla halor ka jingdon jong ki ïa ka mynsiem jingïarap jong ki.