Sepei ban phah da kiwei namar yn dang synshar biang da ka BJP ha Delhi : Bah Sanbor

Shillong, Rymphang 29 : U MLA ka BJP na Shillong South Bah Sanbor Shullai ha ka sngi Palei u la kam ba kan sepei ïa ki paidbah ka rilum Khasi bad Jaiñtia ban phah da ki MP na kiwei pat ki party namar ba ha Delhi ka BJP kan dang wan biang ha ka bor synshar.
Katkum ka jingong jong u, ka la dei ka por ba ki nongthep vote ka Khasi bad Jaiñtia ban ai lad ïa ka BJP ha kine ki san snem.
U Bah Sanbor u la kynnoh ruh ba u MP ba mynta na ka Congress u la pynlut kai ka por jong u ha Parliament naba duna bha ki kam pynroi ba wan sha ka jylla.
Haba kren sha ki lad pathai khubor, u Bah Sanbor u la ong, “Sepei ban phah da kiwei pat ki party. Ki nongshong shnong ka India ki tip bad ki paidbah ka Meghalaya ruh ki tip ba khlem artatien kane ka kynti ïa ka sorkar yn thaw biang da ka BJP hapoh ka jingïalam jong u Narendra Modi. Peit ha ka elekshon ba la dep ka BJP tang marwei ka la jop haduh 333 tylli ki seat.”
U la kam ruh ba ki paidbah ki jied ïa ka BJP namar ka jinglah jong ka ban treikam bha haba ïadei bad ki kam pynroi bad ki skim kiba kyntiew ïa ka rukom im jong ki paidbah khamtam eh ha ki nongkyndong. U ong ruh ba ka sorkar u Modi ka la thaw bun ki skim na bynta ki nongrep bad ki longiing longsem.
“Dei na kane ka daw nga kyntu ïa ki paidbah ka rilum Khasi bad Jaintia ba kim dei ban pynsepei ïa ka por, kim dei ban phah da kiwei ki kyrtong lym kumta san snem ngin sa babe bïang,” u la bynrap biang.
Nalorkata u ong ba lada phah MP na ka BJP na Shillong, u ne ka sa ïoh ïa ka shuki Myntri ryngkat ki tnad kiba biang ba biang nalor kiba bun ki skim ban kyntiew ïa ka ïohkam ïohjam na bynta ki samla.
Ha kajuh ka por u ong ruh ba ka Congress mynta katba nang ïaid ka por ka la nang ngam hadien ba bun ki nongïalam ki la phet noh na ka party bad ïasoh sha ka BJP.