Shillong, Kyllalyngkot 25 : Ka Pondicherry ka la pynliem ïa ka Meghalaya da saw wicket ha ka jingïakhun ha ka sngi Balang jong ka lympung ïalehkai kriket ki kynthei ka Senior Women’s One Day Trophy kaba la pynïalehkai ha Nagpur.
Ka Meghalaya kaba la hap ban tied nyngkong hadien ba ka khlem jop ka jingïakynting pisa, ka kamai 113 ron bad khyllem lut baroh ki wicket ha ki 41.1 over, katba ka Pondicherry ka la lah ban kynjoh sha ka thong ha ki 43 over bad khyllem hynriew wicket.
Ka Meghalaya ka la lah ban ïalehkai bha ha ka liang ki thei kawang bol, ha kaba ka Ajima Sangma ka la ïoh ban pynhap ïa ka wicket jong kawei na ki thei tied sdang tang mar ïasdang kawang bol. Ka la ïoh biang ban khur sa ar wicket da kaba pyndep khur 3 wicket ai kamai tang 10 ron ha ki 9 over, katba ka Debasmita Dutta ka la ïoh ban khur 3 wicket ai kamai 23 ron ha ki 10 over.
Ka Pondicherry ha ka jingkamai 13 ron duh noh 3 wicket ka la nang duh shuh shuh ki wicket haduh ba kan da kamai 69/6 wicket ha ki 32.3 over hynrei ka jingneh wicket bad ka jingkamai ron lang da 45 ron ka Pondicherry ka la lah ban kynjoh sha ka thong ba la buh da ka Meghalaya bad jop syndon da saw wicket.
Shuwa ban kawang bol, ka Sejal Raut sa shisien ka la ïoh ban kamai bun ron biang na ka bynta ka Meghalaya ha kaba ha kane ka sngi ka kamai 45 ron arwei, katba ka Suriti Kumari Ray (11), Anita Lodhi (13) bad ka Dutta (14).
Watla ka dang khmih lynti ban khur jingjop kaba nyngkong hadien ba ka la rem saw sien, ka Meghalaya kan ïakhun sa aireng pat pyrshah ïa ka West Bengal ha ka sngi Thohdieng mynta ka taïew.
