Shillong, Rymphang, 21: U nongïalam jong ka Meghalaya Trinamool Congress u Mukul Sangma ha ka sngi Baar u la sei madan ïa ka jyrsieh bamsap thied jaka ha ka shnong Mawpdang, East Khasi Hills kaba hap hapoh ka New Shillong Township ha kaba la kynnoh ba ka Sorkar ka la thied ïa ka jaka na ki nongkhaii ha ka dor kaba heh ban ïa ka dor die jong ki trai jaka.
Ha ka jingïakren bad ki lad pathai khubor, u Mukul Sangma u la ong ba ki trak khyndew ki la die ïa ka jaka ha ka dor T. 45 shi square feet katba ka Sorkar ka la thied pat ha ka dor T. 85/sqft, kaba lam sha ka jingïapher kaba kot haduh T. 140.7 klur.
Haba kdew ba kam don satia kano kano ka dor ba la buh ban thied na ka bynta ki jaka shimet, u la ong ba ka Sorkar Jylla ka lah ruh ban thied beit beit na ki trai khyndew bad ïa kane ka donkam ban tohkit mano kita ki nongkhaii.
U Sangma u la kyntu ïa ka Ministry of Home Affairs ba kan tohkit halor kane.
Haba kaba ïadei bad kane, u National Vice President jong ka National People’s party (NPP) u Bah Prestone Tynsong u la kyntait war ïa ka jingkynnoh jong u nongïalam ka TMC u Mukul Sangma ba ka don ka jyrsieh bamsap halor ka kam thied jaka ha Mawpdang, New Shillong Township.
U la pynphai nia kylla ïa kane ka jingkynnoh jong u Dr Mukul da kaba ong ba ka dei ka ka jingleh kutlad jong u Mukul Sangma namarba u la sngewthuh lypa ïa kaei ka ban jia ha kam saiñhima jong u.
“Kam dei ka jyrsieh. Kumno phi lah ban ong ba ka dei ka jyrsieh? Ka jyrsieh aiu ba u kata kaba u kren? Shuwa ba ka Sorkar kan thied ïa kino kino ki jaka hap ïaid kat kum ka rukom treikam, ki Deputy Commisioner kin hap ban pynshong dor ïa ka dor jong ka jaka nangta sa ka tnat Revenue kan sa leh ïa kaba sah,” ong u Bah Prestone.
U la ong ruh ba kane ka jingpynlut jong u Mukul Sangma ïa la ka por ba kordor ban kynnoh kawei hadien kawei ïa ka sorkar ka long ba u la sngewthuh lypa ba un shah rem ha ka elekshon.
U Bah Tynsong u la ong ruh ba u sngewskhem ba kawei ka jingkynnoh hadien kawei pan u Mukul Sangma un ïai pynmih manla ka sngi tad haduh ban da kut ka sngi thep vote.
“Hynrei naduh ka 27 tarik Rymphang, un sa lah ban thiah suk jai namar ka jingthep vote kan kut ha ka por 4:00 baje janmiet,” u la ong.
