Ki nongïalam na kiwei ki Party kin mih noh hadien ka elekshon, ka NPP kan ïaineh ha jylla: Conrad

Shillong, Rymphang 21 : U National President ka National People’s Party (NPP) bad Myntri Rangbah ka Jylla Conrad K Sangma, ha ka sngi ba-ar ula ong ba baroh ki ‘Heh Nongïalam’ jong ki seng sain pyrthei bapher bapher kynthup ka BJP, kiba wan ïalap elekshon ha Jylla, kin sa shu jah rngai hadien ka elekshon MLA ban long la 27tarik Rymphang hynrei ka NPP “kan ïai don ha syndah bad u paidbah ka Jylla Meghalaya”.
“Ki Nongïalam jong ki seng sain pyrthei bapher bapher kila ïaid ïalap elekshon mynta ha Jylla bad kila kular ïa ka bneng ka khyndew. Hynrei kim sngewthuh ïa kaei kaba long ba man ha Meghalaya bad tang namar ka nam ïalap elekshon, kila shu pynmih ïa ki jingkynnoh ba laiphew jait” ong u Conrad.
“Mar ïa kut ka elekshon, baroh kin sa shu jah rngai bad tang ka NPP ka ban ïai don ryngkat bad u paidbah ka Meghalaya” u la ong na ka rynsan ïalap elekshon ha Garobadha, ban pan jingkyrshan ïa u kyrtong Subir Marak, uba mih ïakhun pyrshah ïa u Nongïalam ka TMC Zenith Sangma na Rangsakona constituency.
U Conrad ula ong ba ki paidbah ka Jylla kim don lynti da kumwei pat ban jied bad ka la dei ban por ban ai ka jingshaniah ha ka party (NPP) ka ban ïai don ryngkat beit bad u paidbah ka Jylla.
U Conrad ula pyni ruh ïa ki khubor na ka Whatsapp sha ki paidbah, ba batai ba ka jingmut ba pura jong ka TMC ha ka ktien Garo ka dei ka seng sain pyrthei bym long satia bad ka BJP ka ruh kadei kumjuh katba ka NPP ka dei ka party ba wanrah ïa ki kam pynroi.
“Ki paidbah ka Meghalaya ki la ai ka jingshaniah ha ka NPP. Ki paidbah kila ïoh ba ka party jong ngi ka ieng beit na ka bynta ka bha ka miat u paidbah. Ngi la buh ïa ka thong ban pyntyngshain ïa ka Meghalaya bad ngin trei kum ka kynhun ban pynlong ïa ka Meghalaya kaba khlain,” ula kular.
Haba pynpaw ba ka Sorkar kala pynthikna ïa ka jingshongsuk bad jinglong jai jai hapoh ka Jylla, ula ong “Ka rai jong u paidbah sha ka NPP ha kane ka elekshon kan pynthikna ïa ka jingïai bteng jong ka jingwan ki kam pynroi ban kyntiew ïa ka Jylla”.
U Kyrtong ka NPP na Rangsakona Subir Marak ula pan ïa ka jingkyrshan na ki paidbah ba kin jied ïa u kum u MLA. Ula ong ba lada ki paidbah ki ai ka rai ban pynjop ïa u, un aiti ïalade sha ka roi ka par jong ka Rangsakona. Ha kane ka jingïalang, ula kyrpad ruh ïa u Nongïalam ba hakhlieh duh ka NPP ban seng ïa ka College Sorkar ha Garobadha ban kyntiew ïa ka pule ka dangle ha ka thain.
U Subir ula kular ruh ba lada u shah jied, un pyndonkam ïa ka tulop MLA sha ka pule ka dangle jong ki Khynnah hapoh ka Constituency.
Ha kane ka jingïalang, ki nongkyrshan ka NPP kila pynlong ruh ïa ka Bike Rally.