Shillong, Nailar 25: U MLA ka 2-Jowai Constituency u Wailadmiki Shylla ula sdang ïa ka Youth Employment Survey (YES)-2024 na ka bynta ki khun samla ba hab hapoh ka Constituency jong u, ha kaba lyngba kane ka Youth Survey un sdang ban shim jingkheiñ ïa ka jingthrang jingangnud ki samla bad kumjuh katno ngut kiba la pyndep ïa ki jait ai jinghikai bapher bapher khnang ba un tip ha kano ka rukom yn lah ban ïarap ïa ki.
Ka jingshim u Wailadmiki Shylla ïa kane ka sienjam ka dei namar ba u ïohi ha ki por ba la dep ïa ka MLA skhim la juh ai paidbah da ka tin sop ïing, u shem namar ba ka dei kaba shu ïoh ei ki paidbah kiba khlem donkam ruh ki shim beit ïa ka hynrei ki shu buh pat ha kyndong.
Ha ka jingsngew jong u, u ong, ban ïa kaba ai tin sop ïing na ka bynta ban shu buh kyndong, nangne shakhmat dang lah ban ai jingïarap da ki tiar ki tar shaki samla ba la pyndep training khnang ba kin ïoh kamai kajih da kaba ïeng ha la ki jong ki kjat.
Nangta hadien ba la dep ai jingïarap da ki tiar un sa ai jinghikai kyrpang ruh ia ki sa ha kaba ïadei bad ki buit kumno ban pynïaid ïew ïa ki mar ba kila pynmih, kumno ban pynleit pynwan ïa ka pisa ba mih na kaba trei khlem da leh lut phut, khnang ban long ka kamai kaba ïaid beit ïaid ryntih ban im jakpoh bad ban ïoh ïarap ha ïing ha sem.
Shuh shuh u ong da kaba leh kumne ym tang ba la lah ban ïeng ha ki kjat la jong hynrei wat ban ai kam ai jam ïa kiwei ruh.
Katba ïa kito ki bym pat pyndep kino kino ki jait training pat kiba la pynsngew ïa ki jingthrang jingkwah un sa ïarap ïa ki kumno ban ïaid lynti ha ka jingim jong ki.
Ha ka jingïadei bad kane ka Youth Employment Survey-2024, ki samla ki lah ruh ban pyndap form lyngba ka Google Form.
Ïa kane ka Youth Employment Survey u la pynbna paidbah ha ka jingïalang sam Certificate bad ai tiar sha ki 30 ngut kiba la pyndep ïa ka jingshah hikai ha ka sap trei Mistri Rural Masonry na Jaiñtia Institute of Technology da ka jingkyrshan pisa ka Meghalaya State Skill Development Society, ha ka jingïalang ba la pynlong ha Thomas Jones Synod College Jowai.
