New Delhi, Lber 05 : Ka kynhun ïalehkai jong ka Goa ka la ïoh ban poi sha ka semi final jong ka 77th National Football Championship jong ka Santosh Trophy hadien ba ka la ïoh ban pynliem noh ïa ka Delhi da 2-1 kol ha ka quarter final kaba ar ha Golden Jubilee Stadium kaba don ha Yupïa ha Arunachal Pradesh ha kane ka sngi Nyngkong.
Baroh kitei ki lai tylli ki kol jong ka Goa bad Delhi ki dei kiba la ïoh ban thep tang ha ka kylla step katba ka jingïakhun ha ka kylla miet ka la kut haka jingïakhaid khlem don shuh ba ïoh ban thep kol.
Ïa ka kol kaba nyngkong dei ka Delhi kaba ïoh ban lamkhmat tang ha ka minit kaba 8 lyngba u Sahil Kumar. Hynrei dei tang hadien katto katne minit kata ha ka minit kaba 20 ba ka Goa kala ïoh ban pynphai noh lyngba u Jobern Cardozo. Ka jingïakhun ka la nang itynnad hadien ba ka Goa ka la ïoh ban thep biang sa shi kol lyngba u Llyod Cardozo ha ka minit kaba 29.
Katei ka kynhun kaba la ïoh ban ban bat haduh san sien ïa ka nam lahduh kan hap ban kynduh ïa ka kynhun jong ka Manipur ha ka semi final.
Shwa kane, ka Manipur ka la ïoh ban pynliem haduh 7-1 kol ïa ka Assam ha ka jingïalehkai kaba la noh shilliang bha. Ïa ki kol jong ka Manipur la ïoh ban thep da u Phijam Sanathoi Meetei tang ha ka minit kaba 4 jong ka kylla step, pynbud sa u Wangkhei mayum Sadananda Singh da ka hat-trick kata ha ka minit ba 11,16 bad ha ka minit kaba 70. U Ngangbam Pacha Singh ruh u la ïoh lang shi kol ha ka minit kaba 19(P) nalor u Maibam Deny Singh ha ka minit kaba 82 bad u Imarson Meitei ha ka minit kaba 88.
Ïa ka shi kol jong ka Assam pat la ïoh ban thep da u Joydeep Gogoi ha ka minit kaba 64.
Shwa kane, ka Services kaba la bat haduh hynriew sien ïa ka nam lahduh ka la ïoh ban pynliem da 2-0 kl ïa ka Railways ha ka quarter final kaba itynnad bha.
Ha kane ka jingïakhun ruh ka jingthep kol kadei tang ha ka kylla step bad ïa ki kol jong ka Services la ïoh ban thep da u Shafeel PP ha ka minit kaba 9 (P) bad ïa ka kol kaba ar na u Samir Murmu ha ka minit shwa ban kut ka kylla step kata ha ka minit kaba 45+1.
