Nongstoiñ, Nohprah, 1: Da ka jingthmu ban pynkhreh ïa ka jingpynlong ïa ka jingjied nongmihkhmat MLA ne ka Meghalaya Legislative Assembly Election 2023, ka Election Branch jong ka West Khasi Hills ka la pynlong ïa ka jingai jinghikai mynta ka sngi ka 1 tarik u Nohprah 2022 ha Trysem Hall DC office Nongstoiñ.
Ha kane ka traiñing la pynïaid da u bah H.K Thabah ADC, u ba long ruh u RO jong ka 34-Mawshynrut Assembly Constituency, u ba la batai bniah ïa ki kyndon bad ki aiñ khamtam ïa ka jingbthah jong ka Election Commission jong ka Ri India (ECI), ha kaba ïadei bad ka Model Code of Conduct, kiba kynthup ïa ki jingtreikam jong ki Flying Squad Team, ki Static Surveillance Team bad kiwei kiwei.
Ha kane ka prokram ai jinghikai, la wan ban ïa shim bynta da ki RO jong ka 32-Nongstoiñ bad 33-Jyrngam Assembly Constituencies, ARO, AERO, ki ERO, ki Sector Officer, Zonal Officers, ki bor pulit, ki District Heads nalor kiwei pat.
