Shillong, Nailar, 20: Katba ki sngi sha ka elekshon 2023 ki la nang jan, ki Party kiba don ha ka sorkar Meghalaya Democratic Alliance (MDA) ki la sdang ban ïa pyni bor ne pyni ïa ka jinglong hymmen ne lah ban buh da ka kyntien “Boss”.
Ha ka jingbym don ka jingïateh lok ne ka Pre Poll Alliance, wat lada ka jingïatreilang ka la palat saw snem hapdeng ki Party kiba don ha ka MDA, khlem pep baroh ki Party kin pyrshang ban pynpaw ïa la ka jong ka jinglah treikam khamtam eh ha ki tnad
treikam ba ki bat.
Hynrei ki dak ki shin ki paw ba ha kane ka jingpyrshang ban pynpaw kam, ka Seng NPP ka la kham hakhmat namar ba ym tang ba ka don eh ki MLA ha ka sorkar MDA, hynrei ka don ruh ïa ki arngut ki nongïalam kiba hakhmat duh jong ka sorkar, kata u Myntri Rangbah, u Conrad Sangma bad u Symbud Myntri Rangbah, u Bah Prestone Tynsong.
Ha ki katto katne ki khep, kumba ka la paw ha kine ki bnai baladep, kum ka jingïakhih ki Nonghikai skul, la ka long ki Nonghikai skul Adhoc ne ki Nonghikai Skul SSA, ka NPP ka la pynpaw ba ka kham lah bad kham stad ma ka bad ïa ka UDP, namar ïa ka tnad pule puthi la bat da ka UDP, ha kaba u Bah Lahkmen Rymbui, u long u Myntri. U Bah Rymbui udei u MLA ka Seng UDP na Amlarem Constituency.
Ha ka por ba ïakhih da ki nonghikai Adhoc hapoh ka shatri jong ka FASToM, da ki bun sngi, ki nonghikai ki la shong ba sahmiet ha surok, u Bah Rymbui, um shym la khot ïakren satia ïa ki, wat lada kine ki nonghikai ki shong hakhmat Secretariat bad hadien pat hadien Secretariat. Hynrei u Conrad Sangma, Myntri Rangbah ha ka por shiteng miet hadien ba u la wanphai na Delhi, u la leit ban ïakynduh ïa ki ha surok ba ki shong sahmiet. U Bah Rymbui um shym la pyni dak eiei ban pynurlong ïa ka jingdawa jong ki, hynrei ha ka jingïalang jong ka kynhun Myntri pat, la rai ban kyntiew ïa ka tulop jong ki Nonghikai Adhoc, ha kaba ki la weng ruh artad ïa ka jingïakhih jong ki.
Lehse kaba la ktah eh ïa ka u Myntri na ka Seng UDP, u Bah Rymbui, kadei ha ka jingïakhih ki Nonghikai Skul SSA, kiba kumba ïakhih sahmiet ha surok ki Nonghikai skul Adhoc, ki ruh ki la buh ïa ki jingdawa ban pyllait noh ïa ka tulop ba la san bnai jong ki ryngkat ka arrear. Ha kawei na ki jingïakren bad ki lad pathai khubor, u Bah Rymbui, u la pynmih ïa ki kyntien kiba la pynbitar ïa ki nonghikai bad kumjuh ruh ïa ki paidbah ka jylla ha kaba u la byrngem ba ka sorkar kan pynduh noh ïa ka bhah jong ki Managing Committee jong ki skul, kaba dei ka pisa ban siew tulop ïa ki nonghikai SSA, lada ki nonghikai ki dang ïai bteng ïa ka jingïakhih.
Phewse, ha ka sngi kaba bud, u Myntri Rangbah Symbud, u Bah Prestone Tynsong, MLA ka NPP, u la khot ïakren ïa ki Nonghikai SSA bad dei ha kane ka jingïalang ba la rai ban pyllait noh ïa ka tulop jong ki da kaba kular ruh ban sa nang pyllait ïa ka arrear ynda la ïoh ïa ka bhah jong ka jylla na ka sorkar pdeng.
Kane kadei ka khep ha kaba ka NPP kala pynpaw ba ka kham lah ma ka ban ïa ka UDP, kaba wat lada u MLA jong ka UDP u bat ïa ka tnad pule puthi um lah pat ban shim ïa ka rai.
Ka NPP ka la pynpaw ruh mano ba kham long hymmen ha ka MDA, haba ha ka 18 tarik u Nailar 2022, ha ka rai kaba ïadei bad ka jingpyllait biang ïa ka dawai sboh sha ki nongrep. U Myntri ka tnad ka rep ka riang ryngkat ka jingdonlang kiwei kiwei ki MLA, ki ophisar ka tnad rep bad ki nongrep, ki la rai ban pyllait noh ïa ka sboh dawai kaba la khang ban pyndonkam naduh ka snem 2014 bad kawei na ki rai ka long ruh ba ïa kine ki sboh dawai yn nym pat ai subsidy ne ai shiteng dor.
Hynrei ha kajuh ka sngi, ka kynhun jong ki nongrep ha ka jingïalam u Bah Kansing Lynshiang, uba la lah ban ïakhun ïa ka elekshon MLA 2023 na Mawkynrew pyrshah ïa u MLA ka Peoples Democratic Front (PDF) bad u Myntri ka rep ka riang, la shim hi ïa kajuh ka rai ban pyllait noh ïa ka sboh dawai, tangba kane ka jingïalang ba la khot da u Bah Tynsong, ka la shim ruh ïa ka rai ban pyntreikam ryngkat bad ka subsidy, ha kaba ka sorkar kan siew shiteng bad ki nongrep kin siew shiteng ïa ka dor jong ki sboh dawai. Sa shisien pat ka NPP, ka la pyni ïa ka jinglah treikam ban ïa ka PDF.
Namar ba kam don ka jingïateh lok hapdeng ki Party ba don ha ka MDA ban ïakhun ne ïatreilang shuwa ka elekshon MLA 2023, khlem pep kan don beit ka jingïapynksan hapdeng ki Party kiba don ha ka sorkar halor ki jingtreikam bad ki rai ba ka sorkar MDA ka la leh. Ki sngi kiban wan ki long ki sngi kiba itynnad ïa ka drama saiñpyrthei ha ka jylla, khamtam eh ka drama hapdeng ki Party ba don lang ha ka MDA.
