Shillong, Nailar, 20: U Nongïalam ka Liang Pyrshah u Dr. Mukul Sangma ha ka sngi Saitjaiñ u la kynnoh ba ka Sorkar MDA ba la ïalam da ka National Peoples Party (NPP) da kaba ong ba dei ka Sorkar kaba tuh ïa ka hok jong ki khynnah skul, ki longkmie kiba kit khunrei, ki samla wadkam wadjam, ki nongseng kam lajong.
U Dr Mukul u la ong ruh ba ka Sorkar kaba la pynkylla khongpong lut ïa ki polisi kiba ka Sorkar MUA ba la ïalam da ka Seng Congress ka ladep pruid dak.
Haba kren ha ka jingpynskhem ïa ka Pynthorumkhrah Block Committee (PBC) jong ka Trinamool Congress bad ïa ki nongkitkam u Dr. Mukul u la khot la wer ïa ki paidbah nongshong shnong ka jylla ba kin mih shakhmat ban kyrshan ïa ka AITC khnang ban dup lah ban jynrat na ka bor synshar ïa ka sorkar NPP ba la kyrshan da ka BJP bad ïa ki seng saiñpyrthei kiba ïasynrop lang ha kane ka Sorkar.
U la ong ba ka Sorkar MDA ka la tuh ïa ka lawei ki khynnah pule ha kaba ka Sorkar barim ka la wanrah bun ki lad ki lynti ban kyrshan kum ka Uniform, ka Mobile Tablet bad kiwei kiwei ki rukom ai jingïarap. U la ong ruh ba ka Sorkar MDA ka la tuh ruh ïa ka hok jong ki long kmie kit khunrei da kaba pyndam ïa ka skhim kaba ka Sorkar MUA ka ju ai jingkyrshan ïa ki bad u la kynnoh ba wat ki nongseng kam lajong ruh ki shah tuh noh ka hok jong ki.
Ha kaba ïadei bad ka jingkyrduh kam, u Dr. Mukul u la ong ba ka Sorkar MDA kam kwah satia ba ki khun samla ka jylla kin ïohkam ïohjam namarba wat ïa ki kam kiba lait ruh kam shym la pyndap satia kum ha ka tnad pulit.
“Ha ka por jong ngi, ngi la pyrshang ïa ka jingpynrungkam kaba thikna ha ka tnad Pulit hynrei ka Sorkar kaba mynta wat ka kam kaba la pynbna ba ka lait naduh u snem 2019 kat haduh mynta ym pat shym la pyndap satia,” la ong u Dr. Mukul.
“Ka Sorkar MDa ïa ki nonghikai kontrak ka la beh kam bad ha ka jaka jong ki kam shym la thung satia da kita kiba la pyndep ïa ka eksamin MTET bad kito ki khun samla kiba kwah ban long nonghikai kam ailad satia,” u la bynrap
Shuh shuh u la ong ruh ba kum ka party, ka AITC kan ïeng na bynta ki paidbah bad ka hok jong ki ym kum ka Sorkar kaba lilam pynban ïa ki jaka puta kiba ki nongshong shnong ka jylla ki la ïoh pateng na ki kmie ki kpa tymmen.
U la ong ruh ba ka Sorkar MDA kaba la pynkylla khongpong lut ïa ki polisi kiba ka Sorkar MUA ba ïalam da ka Seng Congress ka la pruiddak kum ka MGHIS bad ki mision kiba bun.
Haba kren halor ki jaka pule, u Dr. Mukul u la ong ba ka Sorkar MDA kam kitkhia eiei ban shna pyndep ïa ki jaka pule bad u la ong ba wat ka jaka shlem pule Engineer bad ki jaka pule Doktor kiba ladei ban pyndep ka Sorkar MDA kam shym la pyndep satia.
U la ïathuh ba ka Sorkar Pdeng ha ka jingshisha na bynta ki Medical College ka Sorkar Pdeng ka la pyllait pisa T. 172 klur hynrei kat haduh mynta ka Sorkar MDA ka la pynlut tang T. 60 klur.
U Bah Samborlang Diengdoh, u President ka AITC, Pynthorumkhrah uba long ruh u kyrtong haba kren ha ka jingïalang, u la ong ba dei ki mat kiba ka AITC ka ïeng bad ka jingtbit u Dr. Mukul kum u nongïalam kaba pynïapbiej ban leit sha ka AITC. U la ther ruh ïa ka jingkiew dor ki mar ki mata kaba ki paidbah ki la mad jingeh bad ka jinghiran kaba shyrkhei ki paidbah.
“Ka Sorkar MDA ka la shu ai daw beit ban siew tulop ïa ki nongtrei ba kam don pisa kumno pat ka NPP ka pahuh pisa ban leit seng ïa ka Party ha ki bynta bapher bapher ka ri bad ban ïakhun ilekshon” la buh jingkylli u Bah Samborlang.
U la ong ruh ba kum u kyrtong na Pynthorumkhrah, u buh hakhmat eh na bynta ki baduk bad ki nongbylla bad ruh ki khynnah skul bad ban seng ruh ka kolej khnang ban lah ban ai ka jingshakri ïa ki khynnah pule kiba wan na ka iing ka sem ba duna ka ïoh ka kot.
Ïa kane ka jingpynskhem ïa ka Pynthorumkhrah Block Committee la sakhi lang da u State President ka AITC u Bah Charles Pyngrope, u Vice-President u Bah George B Lyngdoh bad kiwei kiwei ki nongkitkam ka party.
