Ki shitniam Hindu hapoh kata ka seng Kutumba Surakshya Parishad (KSP) ki la sdang ban pyni bor da kaba byrngem ban pakhang ïa ki surok kiba pynïasoh ïa ka Meghalaya bad Assam tang namar ba ka Dorbar Shnong Mawsynram ka khang ïa ka jinglehniam ki paid Hindu ha krem Mawjymbuiñ kaba dei ka jaka jngohkai pyrthei. Ka Dorbar Shnong ka leh ïa kane ym dei ba ka sngew ïapher niam hynrei ka kwah ban pynneh pynsah ïa katei ka jaka kum ka jaka jngohkai ym kum ka jaka leh niam jong ki paid Hindu. Namar lada ailad mano ban tip ha kawei ka por ïoh poi sha ka jingkam longtrai syndon ïa katei ka jaka da ki paid Hindu bad kan sa mih ka jingïakajia bad kulmar kumba jia sha kiwei ki jaka tang na ka daw ba ailad naduh ba sdang ynda la khang lad hadien ki jia ki jingïakulmar bad poi pynban sa ka jingsngew ïapher niam.
Kane ka jinglehniam ne ïaid pilkrim jong ki riewngeit Hindu sha krem Mawjymbuiñ ka dei kaba dang shu sdang dang tang katto katne snem ym pat dei kaba la slem. Kumta ka jingkhang jongka Dorbar Shnong Mawsynram ka dang biang eh mynta katba ym pat dier ka por. Ha ka jingshisha ïa kane ka jingleh jong ka Dorbar Shnong Mawsynram la kyrshan naduh ka NPP, u Myntri sorkar ba dei peit ïa ka tnad kam jngohkai u bah Paul Lyngdoh, u MLA ba rim ka Mawsynram u bah Himalaya Shangpliang, ki Seng Bhalang naduh ka KSU, FKJGP, HYC bad kiwei kiwei bad kumjuh ruh ki riew paidbah.
Balei ba ka Dorbar Shnong Mawsynram ka khang ka daw ka long ba hadien ka jinglehniam dap sa tang ki jaboh jabaiñ ha katei ka krem kaba la pynsniewdur pynban ïa ka kum kata ka jaka jngohkai kaba la wan jngoh da ki nongwan jngohkai ym tang napoh ka ri hynrei wat na shabar ri ruh kumjuh. Ha ka jingshisha ki riewngeit Hindu kim dei ban sngewpher ïa kane ka jingpynïaid jongka Dorbar Shnong namar katei ka jaka ka dei hapoh u pud u sam bad ka jingpeit jongka Dorbar Shnong. Ki la dei ban wan ïakren sngewthuh beit bad ka Dorbar Shnong ym ban byrngem ban pakhang surok pynban ïa ki kali kiba rung ba mih na Meghalaya.
Lada kine ki shitniam ki byrngem kumno aiu kan jia lada ki don ki nong Meghalaya ruh kiba khang ïa ki kali na Assam ban ïaid lyngba ka Meghalaya. Kumta ym dei ban ïa bam jakhluit hynrei dei ban ïa pynbeit ïa kano kano da ka jingïasngewthuh jingmut khnang ban ym mih kino kino ki jingsngew ïapher jingmut ne jingsngew ïapher niam. Wat la kine ki riew shitniam Hindu ki dawa ba ka sorkar ka dei ban weng ïa kane ka rai jongka Dorbar Shnong hynrei ka sorkar kam lah ban weng namar katei ka jaka ka hap ym ha ka sorkar hynrei hapoh u pud u sam jongka Mawsynram.
Ka jingkynnoh jong u nongïalam kane ka seng shitniam KSP ba kane ka jingkhang ka dei kaba la leh da ki paid Khristan bad ki Seng Bhalang ka long kaba bakla haduh katta katta bad ka sorkar ka dei ban leh ei ei ïa une u briew uba wanrah pynban ka jingsngew ïapher niam bad kynnoh sa ïa ki Khristan haba ïa ka rai la shim da ka Dorbar Shnong ym da ki paid Khristan ne da ki Seng Bhalang. Ka sorkar ka dei ban pynngat ïa u ha ki kyndon aiñ kiba pyrkhing bha namar u pyrshang ban wanrah ïa ka jingsngew ïapher niam tang namar ba ki paid Hindu kim ïoh ban leit mane blei sha katei ka krem Mawjymbuiñ.
