Shillong, Lber 24 : Ka Jylla Meghalaya ka la sdang ban paw pyrthei ha ka jingïalehkai siat khnam, lyngba ka jingpynlong jong ka Archery Association of Meghalaya ïa ka 2nd NTPC National Ranking Archery Tournament (NRAT) 2023.
Ka Archery Association of Meghalaya ka la pynlong ïa katei ka lympung naduh ka 19 tarik Lber da kaba sdang shuwa na ki Sub-Junior bad ha ka 23 tarik ka la sdang ban pynïalehkai ïa ki Junior kaba la poi noh sha kaba kut ha ka 24 tarik Lber ha jaka ïalehkai siat khnam kaba don ha SAI, NEHU.
Ka Meghalaya ha katei ka lympung ka la ïoh ban khur ar tylli ki takma lyngba u Devraj Mohapatra uba la jop ha ka kyrdan ba lai ha ka jingïakob siat khnam jong ki Sub-Junior bad ha ka kyrdan jong ki Junior utei u rangïalehkai u la ïoh biang ban khur takma da kaba jop ha ka kyrdan ba lai.
Ki nongïalehkai kiba la jop ha katei ka lympung jong ka kyrdan ki Junior Recurve ki shynrang, u Rampal Choudhary jong ka Rajasthan u jop ha ka kyrdan ba nyngkong, u Amit Kumar jong ka Madhya Pradesh ïa ka kyrdan ba ar bad u Devraj Mohapatra jong ka Meghalaya u jop ha ka kyrdan ba lai.
Ha ka liang ki kynthei, ka Bhagora Bhargavi Vargishkum jong ka Gujarat ka jop ïa ka nam ba nyngkong, ïa ka nam ba ar la ïoh rah da ka Ruma Biswas jong ka West Bengal bad ïa ka nam ba lai la jop da ka Srishti Jaiswai jong ka Chandigarh.
Ha ka kyrdan ïakob siat (Junior Compound) jong ki shynrang ïa ka nam ba nyngkong la jop da u Chirag Vidyarthi jong ka ashya Pradesh, ïa ka nam ba lai la jop da u Hawaibam Teuton Khuman jong ka Manipur bad ïa ka nam ba lai la jop da u Rachit Upadhyay jong ka Delhi.
Ha ka liang ki kynthei, ka Kasal Rutuja Parmeshwar ka la jop ïa ka nam ba lai kaba dei ka nongïalehkai jong ka Maharashtra, ka Saloni Kirar jong ka Madhya Pradesh ka la jop ïa ka nam ba ar bad ka Nikita Dagar jong ka Madhya Pradesh ka la jop ïa ka nam ba lai.
Ha kane ka sngi la wan sakhi u Vijay kumar , IAS, Commissioner Secretary jong ka Sports & Youth Affairs, V. Argawal, IAS, Director, Sports & Youth Affairs, Bah Finely Pariat, General Secretary, MSOA, u Ian Campbell, Edge 10 bad ka Kong Matsiewdor War Nongbri, IAS kaba dei ruh ka President jong ka Archery Association of Meghalaya.
Ka jingïalehkai 2nd NTPC National Ranking Archery Tournament (NRAT) 2023 jong ki Senior kan sdang ha ka 26 tarik haduh ka 27 tarik Lber 2023 ha kaba ki nongïalehkai siat khnam kynsai ka ri India kin wan ban ïashim bynta.
