Nongstoiñ, Risaw, 12: Ka election ban jied ïa ki nongmihkhmat sha ka Ïingdorbar Thaw Aiñ ka jylla ka sah satang saw bnai bad ki kyrtong na ki seng saiñ pyrthei bapher bapher, ki la sdang ban kyndeh mynsiem la ki dei nongmihkhmat kiba don ha kane ka sorkar kaba mynta, ne la ki dei ki bym dei shuh ki nongmihkhmat, hynrei kiba la ïakhun teng ïa ki election ha ki snem ba la dep bad wat kito ki bym pat pyrshang ban ïaleh elekshon mynno myno ruh.
Ha kaba ïadei bad ka Mawshynrut Constituency, u bah Kyrshan Sangriang uwei na ki nongshong shnong na Mawshynrut, u la ong ba ka election ha un snem ban wan ha Mawshynrut Constituency, kan long kaba itynnad haduh katta katta. Namar, haduh mynta ka sur na ki paitbah jong ka ri Lyngngam baroh kawei ka sawa beit tang ha ki ar ngut kata u bah Gigur Myrthong MLA ba mynta na ka NPP bad u bah Methodius Dkhar u kyrtong ka HSPDP.
Ha kajuh ka por u la ong pat ba haba peit ïa ka jinglong jingman bad sngap ïa ka sur na ki paitbah nongshong shnong, u kyrtong ka HSPDP u la nang ïoh mynsiem katba nang mih ki sngi, namar haba pynlong jingïalang haman la ki jaka ban jied ïa ki nongkitkam, ki paitbah ki tuid da ki spah ngut.
U la ong ruh, “Ka jingleit jong ki ruh kam dei ba ki leit bad ki donkam ban pan bai nong, hynrei ki pynlut hi na ka pla bad ki da ong artad ba shuwa ka sngi thep vote kim don kam ei ei hynrei ki donkam ïa ka jingkylla”.
