Nongpoh, Nailur 24: Ka skulbah University of Science and Technology ryngkat ka jngïatrei lang ba ka 42 Meghalaya Battalion NCC mynta ka sngi ka la plie paidbah noh ïa kawei na ki lad ai jinghikai ba la tip kum ka ‘Combined Annual Training Camp 2025 (CATC-103)’ ba kane ka skulbah ka don ïa kata ka thong ban pynkup bor ïa ki samla bad ruh ba kin dang paw ha ka ri hi baroh kawei.
La sdang ïa kane ka lad ai jinghikai da kaba pynieng ïa ka lama ba kynthup ïa ka NCC Lancer Flag bad ka T Flags ha kaba ha kane ka sngi la shim bynta da ki NCC Cadet ban pynpaw ïa ka jingsarong halor ka jingdon kita ki National Cadet Corps.
Kane ka skulbah USTM ka la pdiang burom ruh ïa u Brigadier Thongam Joten Singh, Group Commander, Shillong Group NCC, kum u kongsan jong ka jingplie ïa kane ka lad ai jinghikai na ka bynta kita ki NCC Cadet.
Haba kren ha kane ka sngi kum u kongsan, u Brigadier Thongam Joten Singh u la ai ïa kita ki symboh pyrkhat ne ka khubor ai mynsiem da kaba kyrpad ïa ki Cadet ba kin don ïa kata ka akor ka burom, ka jinglong nongïalam bad ruh ban ai kata ka jingshakri na ka bynta ka ri.
U la ai ruh ka jingïaroh ïa ka USTM kaba la ku kyrshan ïa ka NCC bad ruh ïa ka rukom treikam ban saindur ïa ki samla ba kin don ïa kata ka jingkitkhlieh na ka bynta ka ri.
La don lang ruh ha kane ka sngi da u Lt. Col. Virender Pant bad u Lt. Col. Shashank Parmar, kiba la pashad ïa ki symboh pyrkhat ban ai mynsiem ïa ki khun samla ban don ha ka NCC bad ruh la ban khia ban pynrung ïa ka jingmut jingpyrkhat ki samla ban don ha ka NCC.
Ha kane ka sngi, la ai jingkren pdiang ruh da u Chancellor ka USTM u Mahbubul Hoque, uba la pynpaw ïa ka ïaroh ïa ka NCC, kaba dei kawei na ka kynhun ba la ju synniang ban saindur ïa ka jingkiew shaphrang jong ki khun samla hapoh ka ri.
Shuh shuh, la pyntip ruh tang hapoh ka 10 sngi, la don haduh 500 ngut ki NCC cadet kiba la wan shim bynta na ki jaka pule bapher bapher ki ban shim bynta ha kane ka lad ai jinghikai kyprang na ka bynta ki NCC cadet bad ruh ki ioh ïa kita ki jaid jinghikai bapher bapher kum kita ki NCC Cadet.
