Ha kine ki khyndiat sngi la ïohi bad ki pulit ka jylla ki la sdang biang ban khang ïa ka jingtahïit ïong ha ki kali, hynrei hato katei ka jingtar ka kut noh tang ïa ki riew paidbah mo, kumno shaphang ki heh sorkar pat? Ka jingpyndonkam ïa ki ïit ïong ka pynlong ïa ki kali ki jaka rieh jong kiba bun ki riew shim kabu naduh ki jingïoh riehtngen jong ki riew pyntriem haduh ka jingshah shim kabu ki riew lui lui khamtam lei ki kynthei hynnah samla. Baroh ki sngew ba ka jingdon jong ki ïit ïong kiba ym don ba lah ban ïohi ka ai jingshngaiñ ïa kiba leit ba wan marwei bad ruh ka buh rieh ïa ki tiar ki tiar kiba ki kit ki rong, hynrei bunsien ngi klet ba kane ka juh ka ïit ïong ka buhrieh ruh ïa ki riew shim kabu bad ka ai jaka rieh ruh ïa ki riew pyntriem ha kitei ki kam kiba har rukom. Hooid ka jingtah ïit ïong ïa ki kali ka kham pynitynnad bad ikhia shisha ruh ïa ki kali ba ju pyndonkam shimet. Hynrei hadien kine ki khyndiat snem ba ki pulit ka jylla kila khang ïa ka jingpyndonkam ïa jingtah ïit ïong mynta ka jingtah ïit ïong ka la sdang biang.
Ka sorkar lyngba ka tnad pulit ka la pynmih ïa katei ka hukum ban tar ïa ki iong la kham katto katne por naduh ki snem ba la dep, hynrei katei ka aiñ ka la trei kam suki bha. Bun hi ki sakhi ïa ka jingshisha ba wat ki kmie ki kpa kim tip shaei ki khun samla jong ki, ki leit namar mar la kiew ha ki kali ïit ïong ymtip shuh wat la ki don tang ha surok ba phyllaw ïing ruh. Ki bun bah ki jingjia ha kaba ki riew lyngkar ki ialuh samla sahuh hapoh ki kali iit iong wat hapoh shnong poh thaw ruh tang ka kham kynjah briew kim salia shuh iano iano ruh. Ka jingiohlad ban don hapoh ka kali iit iong imat ia ka long hi kumba tap hapoh ka nep. La ju don ka jingjia ba ki riew shi kabu kim ju rung hi wat shapoh iing jong kita ba ki kam ba ki dei ki baieit jong ki, hynrei ki shu sangeh kali beit harud surok bad pynlong ka jingïakynduh bad jingleh sahuh beit tang hapoh kali. Katno ka long shisha kaba i jakhlia bad kane ka pynpyut shisha ïa ka imlang sahlang.
Da ka jingiohlad ban pyndonkam da ki kali tah iit iong, bunsien wat haba kit jubor ïano ïano ruh ki paidbah kim lah satia ban tip namar ba ym ïohi shapoh. Ki riew pyntriem ki ïoh shisha ban rieh tngen bad katno ki sngewshngaiñ ban leit ban wan bad pyndep ia ki jingthmu jongki. Khlem pep wat ki bor ka aiñ hi kin shem jingeh shibun eh wat ban buddien ïa ki riew sniew kiba leit ba wan namar ba kim lah ban ïohi ba mano ba don ha ki kali ba la tah ïit ïong. Khlem pep ruh ki kmie ki kpa kiba don ki khun samla ki ïakynduh jingeh shibun ban pynthikna ba ki khun jong ki, ki leit ki wan bad ki briew kiba kumno. Ka long kaba suk ïa ki riew shim kabu ban shet kylla ïano ïano bad ban leit da ka kynhun wat hadien ba la ïakut tang para marwei. Lada dei ba ym don ka jingkah ka iit iong da kaba suk lah ban ïohi mano ba don hapoh ka la ki bad la lah ban sngewthuh lypa ban kiar ne ïada na ka jingjia ba sngewsih kaba lah ban jia.
Ka jinglah ban weng ia ki iit iong wat la lehse kam long eh ka lad jingiada (solutions) ba 100% ban khanglad ia ki kam sniew, hynrei khlem pep kan kham tehlakam bad wanrah ia ka jingsngew shynraiñ pyrshah ia ki kam sniew ba bun jait. Ki samla kiba dei khamtam ki khun ba riewspah kin duhlad ban lum paralok hapoh kali iit ïong bad pynlong mobile sitting room (kamra shongkai ba ïaid), pynheh jingtem baroh shi lynter surok bad leh sahuh kum ka jingïadih ïabam sahuh, ialuh samla lyngkar bad kumta ter ter. Ha ka juh ka por ki riew bymman kin ym lah ban ïaid laitlan namar ba wat lada ki shong hapoh kali ruh lah ban ïohi paidbah bad ruh da ki briew jong ka aiñ.
Don kiba ong ba ka long ka jingduh jingmyntoi lada weng noh ia ki iit iong namar kito kiba ñiah kali marwei sha ki lynti ha kham jngai bad por mynmiet kin sngewshngaiñ namar ba ki riew shim kabu ki lah ban tip da kaba suk katno ngut ki don briew hapoh kali. Khamtam ki kynthei kin ym shngaiñ shuh ban ñiah kali por miet, ha ka juh ka por kan pynsalia ruh ban ieh ïa ki kali ha ki jaka sangeh ne parking lot ryngkat bad ki tiar kiba shongdor kum ki Lab Top bad Mobile bad kiwei pat ki tiar ha ka por ba ki leit siew leit pet namar ba ki nongtuh bad riew shim kabu kin lah da kaba suk ban ïohi don aiu hapoh kali. Hynrei ka jingkylli mynta ka long haduh katno katei ka aiñ ka treikam namar ba kane kam dei satia ka sien nyngkong ban weng ia ki ïit ïong, hynrei haduh mynshuwa ruh na ka por sha ka por ka la ju jia.
