Durand Cup: SLFC 2 – 0 RUFC : Lamkhmat ka Lajong ïa ka Group-F da ka jingïapher kol

Shillong, Nailar 10: Ki ar kol ba la thep ba la thep da ki rangapdien, u Ronney Willson (26 min) bad na u Kenstar Kharshong (49 min) ka la pynthikna ïa ka Shillong Lajong FC ban pynliem ïa ka Rangdajied United FC ha ka jingïa-tynjuhbor ki ar tylli ki klob trai jylla kaba la tip kum ka ‘Shillong Derby’ ha ka lympung 133rd IndianOil Durand Cup, ha Jawaharlal Nehru Stadium, Shillong.
Da kane ka namjop, ka Shillong Lajong mynta ka la ïoh ban kyntiew ïalade ha khliehduh jong ka Group-F da 6 point, ban ïaryngkat bad ka FC Goa hynrei lamkhmat lyngba ka jingïapher kol (Goal difference), ka ban pynlong ïa ka jingïakhun kaba khadduh hapdeng kine ki arliang ha ka 17 tarik Nailar kum ka jingïalehkai ka ban pynthikna mano ban ïai bat ïa ka kyrdan ba nyngkong.
Ha kane ka jingïakhun u Jose Hevia head coach ka Shillong Lajong u la wanrah jingkylla tang ïa u nongapkol, ha kaba u Neithovilie Chalieu u la mih bujli ha jaka u Manas Dubey, katba na ka liang jong u Ainbanjop Shadap – Head Coach ka Rangdajied United u la sei madan da ki juh ki player kiba ïakhun pyrshah ïa ka FC Goa na bynta kane ka jingïalehkai Shillong Derby.
Ka long ka jingïalehkai kaba itynnat naba baroh arliang ki la sei lut ïa ka sap ka phong da kaba pynkhlaiñ shakhmat. Ka jingïalehkai ka long kaba stet bad ka jingïoh pashat bol ka long marïaryngkat, ha kaba baroh ar ki la ïoh ban pynsmiej markylliang ïa ki rangapkol. Lah ban kdew ba ka jingïaknieh ban ïoh synshar ïa ka bol ka khamjur hapdeng ki rangïalehkai pdeng (midfield).
Ka Shillong Lajong ka la ïoh ban lamkhmat hadien mar shiteng ba la ïaid ka kylla step. Ka jingbymlah ki bak ka Rangdajied ban pyllait ïa ka bol ba la pynrung lyngba ka free-kick ka la plielad ïa u Kenstar Kharshong ban pashat ïa ka bol sha u Ronney Willson ban pynkhihjar.
Ka Rangdajied ka la ïoh ïa ka kabu ksiar ban pynïakhaid, hadien ba ka la ïoh penalty hynrei ka jingpyrshang na u Treimiki Lamurong ka la shu sepei. Lah ban kdew ba ka Lajong ka la ïoh kham bun tylli ki kabu shuwa ban jam sha kaba kut ka kylla step, bad ka jingpyrshang na u Everbrightson Sana la shah khanglad noh ha u Denelson Pyngrope (bak ka Rangdajied) ban pynneh ïa ka kol da 1-0 kol.
Ha ka kylla miet, ka Shillong Lajong ka la nang pynkhlaiñ shuh shakhmat bad tang hadien saw minit ka la ïoh ban pynkhih sa ïa ka kol kaba ar. Kane ka kol la thep da u Kenstar Kharshong, u ba la kynthih hajrong ban pyndei tiak da ka khlieh ïa ka bol ba la pashat lyngba ka corner kick.
Ka Lajong ka la ïai bteng ban tehlakam ïa ka bol da kaba ñion shakhmat, kaba la pynlong ïa ka liang pyrshah ban kyrshan skhem ha bak.
Haduh kaba kut jong ka por, ka Lajong ka la lah ban ïada khlem da shah thep ban pynthikna ïalade ban jam ha khliehduh na ka Group-F, bad kan pynkhreh ban aireng pyrshah ïa ka FC Goa ka ban long artad ka jingïalehkai ka ban rai mano napdeng kine ki arliang ban rung quarterfinal na ka group.
Mynta ka sngi, ka Punjab FC bad ka Mumbai City FC kin ïakhun na ka Group C ban long ha Kishore Bharati Krirangan, ha ka por 4 baje nohphaisngi.
Katba ka Chennaiyin FC bad ka Assam Rifles FT kin pynkut ïa ka lynti ïaid ha kane ka 133rd IndianOil Durand Cup ha ka jingïakhun ka ban long ha JRD Tata Sports Complex ha ka por 7 baje jan miet. Baroh ar kynhun kim don jingkyrmen shuh ban jam sha ka wat ïakhun knock out, naba baroh arliang ki la mad namrem ha ki ar tylli ki jingïakhun pyrshah ïa ka Jamshedpur FC bad ka Indian Army FT.