Shillong, Naitung 06: Ka sienjam ba 14 jong ka Senior National Pencak Silat Championship 2026-27, kaba lai sngi, ka la sdang naduh hynne ka sngi Nyngkong, ha SAI Multi Purpose Indoor Stadium.
Haduh kumba 1500 ngut ki nongïalehkai kynthei bad shynrang na kylleng sawdong jong ka ri, ba kynthup lang ïa ka kynhun ïalehkai jong ki tnat Pulit, ka Services bad kiwei kiwei, ki la wan ban ïashim bynta ha kane ka lympung mynta u snem.
ïa kane ka lympung kaba lai sngi la pynlong da ka Indian Pencak Silat Federation (IPSF) ryngkat ka jingïatreilang bad ka Meghalaya Pencak Silat Association (MPSA).
Ka Pencak silat kadei ka jait jingïalehkai martial art na Indonesia kaba dei shi bynta jong ka jingïalehkai ha ka Asian Games. Ki nongïashim bynta ha kane ka jingïalehkai ki ïakhun ha baroh ar ki kyrdan, kata tanding bad ka seni.
La wan plie pyrda ïa ka da u Working President ka Meghalaya State Olympic Association-bah John F Kharshiing, bad na ka liang ki nongïalam ki la kyntu ban pynrung ïa kane ka jingïalehkai ha ka National Games, ban sa long ha kane ka jylla ha u snem ban wan.
Haba kren kum u kongsan, u bah John u la pynpaw ba ka rai ban jied ïa ki jait jingïalehkai naka bynta ka National Games ka dang ïaid shakhmat bad ki jingïakren ki dang ïaid hapdeng ka sorkar pdeng, ka sorkar jylla, ka Indian Olympic Association bad ka MSOA.
Ha ka jingkren jong ka kong Philia Thomas, Senior Vice-President ka IPSF, ka la ïathuh kumno ka pencak silat ka la roi ha India ha kine ki snem. “Shi snem mynshwa kane ka jingïalehkai kam don jingithuh, kam don ki jingtei, kam don ka lawei. Ki don tang katto katne ki coach kiba aiti lut bad katto katne ki nongïalehkai ha ki katto katne ki jylla kiba la pynlong ïa ka ban ïaid shaphrang,” ka la ong.
“Mynta la lah ban pynurlong ïa ki Championship ha ka kyrdan jong ki distrik, ki jylla bad ka ri bad ka ri India ka la lah ban jop ïa ki takma ha ki rynsan ïakop bar ri. Ngi la pynlong ïa ka pencak silat ba kan long jong ngi.”
Hadien kane, la ïoh ruh ïa ka jingkren na u Kishore Yealiah, President jong ka ka Pencak Silat Federation of India bad kumjuh ka jingaiti ïa ka dorkhas ha u kongsan da u Deep Kumar – Co-ordinator North East Pencak Silat Federation.
Ha shwa ban pynkut ïa ka jingïalang plie ka la don ka jingpyni ïa ka rukom ïalehkai jong ka pencak Silat kaba la pyni da ki samla kynthei bad shynrang.
