SHILLONG, Naitung 06: Ka sienjam ba 11 jong ka Meghalaya State Shooting Championship 2026 ka la poi sha kaba kut hadien ka jingïakop siat kaba 6 sngi lynter ha Assam Regimental Centre, Shillong.
Kane ka lympung ba la sdang naduh ka 30 tarik u Jylliew haduh ka 05 tarik u Naitung, 2026, ka la lumlang shi jaka ïa ki 128 ngut ki nongïalehkai ïakop siat na ki hynriew tylli ki District kiba ïakhun ha ki 68 tylli ki kyrdan ïalehkai.
Kane ka jingïakop ka la long ruh kum ka rynsan pynkhreh ba kongsan hashwa ka lympung ïalehkai ‘39th National Games 2027’, kaba yn sa pynlong da ka jylla Meghalaya. Ki District kiba la sei ïa ki nongïashim bynta ki kynthup ïa ka East Khasi Hills, West Khasi Hills, East Jaintia Hills, West Jaintia Hills, North Garo Hills, bad ka West Garo Hills. Ka jingbun ki nongïalehkai ka pyni ïa ka jingjylliew bad ka jingroi jong ka jingïakop siat ha kylleng ka Meghalaya.
Kane ka lympung ka la khring ruh ïa ki nongïashim bynta kiba dang khynnah bad kumjuh ruh kiba la rangbah tam.
Uba khynnah tam u dei u Kerdaiai Syiemlieh, uba dang 12 snem ka rta bad u shim bynta ha ka ïakop siat Air Rifle ba 10 mitar, katba uba rangbah tam u dei u John Kharshiing, 64 snem ka rta ha ka Senior Masters Pistol 25M — ha kaba ka jingïapher ka long 52 snem hapdeng kine ki arngut.
Sa shi sien ka Assam Regimental Centre ka la pynbiang ïa ka jaka bad ki tiar ban pyndonkam na ka bynta kane ka championship kaba hynriew sngi lynter. Ka jingsam khusnam la pynlong man ka sngi sha ki nongïalehkai kiba la jop ha la ki jong ki kyrdan.
Ha ka 03 tarik Naitung, ki kynrem ki lyndan ki kynthup ïa u DIG Naval Singh jong ka BSF Jowai Sector, Retd. Col. Aibanjop Sooting, PWD Under Secretary Phrangki Pale, bad MSGEEF Secretary General Kong B. Kharshandi. Ha ka 04 tarik Naitung, ki kongsan ki kynthup ïa u Paiem K.M. Syiemlieh, Dy Syiem ka Hima Nongkhaw, bad u Vedant Jain.
ïa ka jingïalang pynhap pyrda, kata ha ka 05 tarik Naitung, la ïalam da u Dr. Vijay Kumar D, IAS, Commissioner & Secretary jong ka tnad ïalehkai ka sorkar Meghalaya, uba la ïadonlang kum u Kongsan ban sam ruh ïa ki khusnam sha ki nongïalehkai kiba kynsai.
Haba ai jingkren u Dr. Vijay Kumar, u la pynksan ïa ki jingkordor jong ka jinglong ryntih, ka jingpynleit jingmut bad ka jinglong kaba thikna, bad ong ba kine ki jinglong kin ïarap ïa ki nongïalehkai ka Meghalaya ban buh dak pynsah nam ha ka ri baroh kawei.
U la pynbna ruh ba ka sorkar ka la rai ban buh ïa ka Integrated Shooting Range ha kane ka jylla, ka ban neh slem bad ka ban long ka jingmyntoi na ka bynta ki nongïakop siat.
Na ka liang u President ka Shooting Association of Meghalaya (SAM), bah John F. Kharshiing, u la kren halor ka jingtei ïa ka pateng kaba neh na ka bynta ka jingïalehkai ïakop siat ha ka jylla bad pynpaw ka jingsngew skhem ha ka jingpynkhreh jong ka Meghalaya na ka bynta ka National Games 2027.
Ha kane ka sngi la sakhi lang ruh da u Commandant ka Assam Regimental Centre u Brig Vikas Rai Shadilya bad u Deputy Commandant Col.Mahender Pde.
Haba ai khublei, u General Secretary jong ka synjuk u Neil Sootinck, u la ïaroh ïa ki sap kiba mih na man la ki District bad pynskhem biang ïa ka jingangnud jong ka Association ban pynbiang ïa ki jaka ïalehkai kiba kham khlaiñ na ka bynta ki nongïalehkai.
U la ai khublei ruh ïa ki nongïakop siat suloi, ki kmie ki kpa, ki coach bad ki nongtrei ka Assam Regimental Centre kiba la ai ka jingkyrshan ban pynlong ïa kane ka lympung kaba seisoh.
