Mawkyrwat, Jymmang 14: Ka lympung ïalehkai kynjatbol jong ka Meghalaya State League (MSL) kaba dei jong ka Mawkyrwat Zone ha ryngkat ka jingïatreilang bad ka Mawkyrwat District Sports Association (MDSA) ha ka sngi saitjaiñ jong ka taïew ka la ïoh ban sdang ha kaba ka Mawten Sports Club bad ka Pyndengrei Social Cultural & Sports Club ha ka madan Artificial Turf, MDSA, South West Khasi Hills District.
Haba phai ha ka jingïalehkai hapdeng kine ki ar tylli ki kynhun ïalehkai ka Mawten SC ka la ïoh ban khur ïa ka nam jingjop da kaba pynliem noh da 2 – 1 kol pyrshah ïa ka Pyndengrei SC&SC bad ka jingïalehkai ka long kaba itynnad ryngkat ka jingrisa na ki nongwan peit kai.
Ka jingjop jong ka Mawten SC ka la wan lyngba ki kol ba la ïoh ban thep da u Wellbokstar Iawphñiaw bad u Overshap Iawphñiaw katba ïa ka shi kol jong ka Pyndengrei SC&SC la ïoh ban thep da u Balming Lyngkhoi. Namarata, da ki ar kol ba ka Mawten SC ka la ïoh ban thep ka la ïoh ruh ban khur 3 poiñ.
Ha kane ka sngi plie pyrda ïa ka jingïalehkai kynjatbol jong ka Meghalaya State League (MSL) kaba dei jong ka Mawkyrwat Zone, u MLA jong ka Mawkyrwat Constituency, u bah Renikton Lyngdoh Thongkhar u la ïoh ban plie pyrda da kaba u la ïoh ban khublei kti ïa ki ‘rangïalehkai ha ryngkat ka jingïadonlang ryngkat u Dr. Lumbor Mawsor dkhot jong ka Meghalaya Football Association (MFA), ki dkhot jong ka MDSA ha ryngkat ki paidbah kiba la wan sakhi lang ha kane ka sngi.
