Shillong, Rymphang 14: Ka Shillong Cricket Association (SCA) hynne ka Sngi ka la ïoh ban sdang shakhmat ïa ka lympung Shillong cricket league 1st division ha madan SCA ground, Polo, ha kaba ka jingïakhun kaba nyngkong ka la long hapdeng ka Donkin CC pyrshah ïa ka Lumpangad CC.
Haba phai sha ka jingïalehkai, ïa ka toss la jop da ka kynhun Donkin CC bad ka la jied ban tied nyngkong.
Na ka liang jong ka Donkin ka la tied 104 ron shuwa ban shah pynhap baroh 10 wicket na ki 24.4 over. U Vishal Konwar u la kamai 24 ron naki 31 bol, katba u Rohit Rai u la tied 21 ron naki 32 bol.
Napdeng ki rangkawangbol kiba seisoh na ka liang ka kynhun Lumpangad ki long u Vishal Kumar Balmiki (5 over: shah tied 14 ron bad khur 4 wicket) bad u Abhay Kumar Rai (3 over: shah tied 15 ron: khur 2 wicket).
Haba pyrshang ban beh ïa ka thong ba la buh, ka Lumpangad ka la shah khanglad noh da tang 91 ron shuwa ba ki 10 ngut kin shah pynkhyllem naki 29.3 over.
Tang u Abhay Kumar Rai (19 ron naki 27 bol) bad u Praveen Katty (18 ron naki 22 bol) kiba la lah ban kyntiew ron ïa ka kynhun.
Haba phai sha ki rangkawang bol ka Donkin CC, u Rohit Rai u la khur 2 wicket na ki 8 over, katba u MD Muksodel u la khur 2 wicket naki 7 over.
Ka namtam lane Man of the match ha kane ka jingïakhun la khur da u Rohit Rai u ba la tied 21 ron ryngkat bad 2 wicket kiba u la ïoh khur ha ka bol, kaba la ïarap ïa ka kynhun ban khur ïa ka jingjop ha kane ka jingïakhun da 13 ron.
